Þrír dagar í pílupartýið: Fótboltapar og Hraðfréttamaður

Úrslitakvöldið í Úrvalsdeildinni í pílukasti er á laugardag og sama kvöld verður Stjörnupílan haldin í fyrsta skipti, þar sem frægir Íslendingar spila með bestu pílukösturum landsins. Það er því vert að kafa betur í liðin sem taka þátt, sem og þá fjóra keppendur sem freista þess að vinna Úrvalsdeildina í beinni útsendingu frá Bullseye á Stöð 2 Sport.

Reglur í Stjörnupílunni verða nánast hefbundnar þar sem spilaður verður 501 tvímenningur. Reglubreytingar verða þannig að fagmennirnir þurfa að hitta í tvöfaldan reit í lokin til að vinna legg en þjóðþekktu áhugamennirnir þurfa bara að hitta í þann reit sem hentar til að klára legginn, sem gefur þeim því smáforgjöf.

Í gær kynntumst við tveimur liðum og nú er komið að því að skoða tvö lið til viðbótar, og þá sérstaklega einn þeirra fjögurra keppenda sem verða einnig á úrslitakvöldi Úrvalsdeildarinnar.

Tveir knattspyrnumenn mynda eitt liðanna. Það eru þeir Þorgeir Guðmundsson og Adam Ægir Pálsson en þeir eru hinsvegar frá liðum sem hafa eldað grátt silfur saman í gegnum árin. Þorgeir er harður KR-ingur og Adam Ægir hefur spilað með Víkingi og Keflavík.

Þorgeir er 78 ára gamall, kemur frá Pílufélagi Reykjavíkur og hefur stundað pílu á Íslandi í heil 33 ár. Þorgeir er þrefaldur Íslandsmeistari í pílu og hefur unnið fjölda móta hér og þar í gegnum tíðina. Þorgeir varð sömuleiðis nokkrum sinnum meistari með KR áður en að pílan tók öll völd. Þorgeir hefur verið einn af okkar fremstu kösturum í þrjá áratugi og óhætt að segja að keppnisskapið hafi alls ekki minnkað með árunum þar sem mótherjar hans hafa flestir lent í því þegar Goggi fer í ham.

Adam Ægir er 24 ára fótboltastjarna hér á Íslandi. Hann spilaði upp yngri flokka með FH og Breiðabliki áður en hann færði sig í Keflavík og þaðan til Víkings. Adam hefur spilað 44 leiki í efstu-deild og skorað í þeim leikjum 8 mörk. Árið 2021 varð Adam Íslandsmeistari með Víking og átti stóran þátt í því tímabili hjá Víkingsmönnum þar sem endaspretturinn var rosalegur. 

Hann fór að láni til Keflavíkur á síðasta tímabili og gerði sér lítið fyrir og endaði sem stoðsendingakóngur Bestu deildarinnar 2022 og hjálpaði Keflavík að sigra neðri hluta mótsins. Adam hefur sett sér það markmið að verða sjónvarpstjarna einnig og fannst honum þetta gott tækifæri að sýna sitt andlit fyrir cameruna, í fyrsta skipti án bolta.

Arnar Geir Hjartarson er nýtt nafn í íslenskri pílu og er heldur betur að fara upp á við. Arnar er 27 ára og hefur aðeins stundað pílu í tæp tvö ár. Hann kemur að norðan, spilar undir hatti Pílu- og bogfimideildar Tindastóls, og er einnig hörkugóður kylfingur. Arnar gerði sér lítið fyrir og vann sinn riðil fyrsta kvöld Úrvalsdeildarinnar í haust og voru það svo sannarlega óvænt úrslit. Einu verðlaunin hingað til eru eftir sigur í Silfurdeild Novis sem er önnur deild hérna heima.

Vill Skálmöld áður en hann kastar og er með minna en núll í forgjöf

Þar sem Arnar Geir er einn af þeim 4 sem keppa til úrslita þá fengum við hann til að svara nokkrum laufléttum spurningum.

Makkerinn hans Arnars er alvöru prófíll; Hraðfrétta- og sjónvarpsmaðurinn Fannar Sveinsson. Hraðfréttir hafa verið eitt vinsælasta sjónvarpsefni landsmanna í áraraðir og mætti segja að Fannar sé með stjörnuframmistöðu í þeim þáttum. 

Fannar hefur einnig leikstýrt og skrifað þætti á borð við Venjulegt Fólk og Framkoma sem hefur verið í sýningu á Stöð 2 þar sem hann fer og hittir vonandi framtíðarleikmenn í Stjörnupílunni. Fannar er ættaður úr Vesturbænum en fór fljótt í Fossvoginn 5 ára gamall og segist vera alltaf smá KR-ingur í sér. Henry Birgir og Stefán Árni, sem drógu í lið fyrir Stjörnupíluna, vildu setja mikinn pening á það að Fannar myndi kasta mjög hratt. Ho, ho, ho.