Innlent

Lands­réttur stað­festir lög­mæti smá­lána­starf­semi

Auður Ösp Guðmundsdóttir skrifar
Taldi Neytendastofa að íslensk lög ættu að gilda en íslensk lög höfðu að geyma ákvæði um hámarks lántökukostnað á meðan dönsku lögin gerðu það ekki
Taldi Neytendastofa að íslensk lög ættu að gilda en íslensk lög höfðu að geyma ákvæði um hámarks lántökukostnað á meðan dönsku lögin gerðu það ekki vísir/valli

,,Það sem við vissum allan tímann og fullyrtum var rétt. Smálán veitt af dönsku fyrirtæki heyrðu undir dönsk lög og voru lögleg allan tímann á Íslandi eins og annarsstaðar í Evrópu,“ segir Haukur Örn Birgisson lögmaður smálánafyrirtækisins eCommerce. Þann 18. nóvember síðastliðinn staðfesti Landsréttur dóm Héraðsdóms Reykjavíkur frá því í ágúst síðastliðnum þar sem úrskurður Neytendastofu um meint ólögmæti smálána var felldur úr gildi.

Taldi Landsréttur lánafyrirkomulag danska smálánafyrirtækisins eCommerce í fullu samræmi við lög og dæmdi Neytendastofu til þess að greiða smálánafyrirtækinu samtals 2.000.000 kr. í málskostnað fyrir héraðsdómi og Landsrétti.Ecommerce hyggst fara fram á bætur vegna málsins en í kjölfar úrskurðar Neytendastofu var þrýst á samstarfsaðila fyrirtækisins að sniðganga það og í kjölfarið neyddist Ecommerce til að hætta rekstri.

Sögðu dönsk lög eiga að gilda

Upphaf málsins má rekja til að þess að árið 2019 komst Neytendastofa að þeirri niðurstöðu að lán danska félagsins eCommerce væru ólögleg þar sem lánssamningar vísuðu til þess að dönsk lög ættu að gilda um lánastarfsemina. eCommerce hefur rekið fyrirtækin Hraðpeningar, Kredia, Múla og fleiri vörumerki.

Taldi Neytendastofa að íslensk lög ættu að gilda en íslensk lög höfðu að geyma ákvæði um hámarks lántökukostnað á meðan dönsku lögin gerðu það ekki. Danska félagið kærði niðurstöðu Neytendastofu til áfrýjunarnefndar neytendamála, sem staðfesti fyrri niðurstöðu. Ákvað danska félagið því að bera úrskurðurinn undir dómstóla, sem dæmdi danska félaginu í vil og felldi úrskurð Neytendastofu úr gildi.

Í kjölfarið áfrýjaði Neytendastofa málinu til Landsréttar sem nú hefur úrskurðað að hinn áfrýjaði dómur skuli vera óraskaður.

Ýmsir aðilar fóru fram úr sér í umræðunni

Í tilkynningu frá eCommerce segir að mikið tjón hafi hlotist bæði af því að félagið þurfti að una niðurstöðu Neytendastofu og breyta viðskiptamódeli sínu.

Öll útistandandi lán voru endurreiknuð og lækkuð til að koma í veg fyrir sektir ásamt því að ný lán voru með lægri kostnaði en fyrir. Þá kemur fram í tilkynningunni að Neytendasamtökin, VR stéttarfélag og hinir ýmsu stjórnmálamenn hafi þrýst á samstarfsaðila þessara fyrirtækja að hætta samstarfi enda starfsemin ólögleg. Samstarfsaðilar fyrirtækisins hafa því legið undir ámælum og pressu, sem leiddi til þess að þeir slitu samstarfi sínu við félagið. Að lokum hafi félagið neyðst til þess að hætta rekstri og lánasafnið var selt til innheimtufyrirtækis.

eCommerece hyggst nú leita réttar síns í málinu. „Það sem þetta mál hefur haft í för með sér er að rekstur fyrirtækis sem stundaði lögleg viðskipti lagðist af og löglegt kröfusafnið var selt til innheimtufyrirtækis. Ýmsir aðilar fóru fram úr sér í umræðunni og nú liggur fyrir að ekki var innistæða fyrir yfirlýsingum þeirra. Þarna hefur því orðið mikið tjón fyrir aðila sem var hafður að rangri sök. Næstu skref hljóta að felast í því að sækja bætur fyrir tjón sem af hefur hlotist, á hendur þeim aðilum sem bera ábyrgð á tjóninu,“ segir Haukur Örn.


Tengdar fréttir

Smá­lána­fyrir­tæki hafði betur í máli gegn Neyt­enda­sam­tökunum

Breka Karlssyni, formanni Neytendasamtakanna, var óheimilt að fullyrða að lán smálánafyrirtækisins eCommerce 2020 hafi verið úrskurðuð ólögleg. Þetta er niðurstaða Héraðsdóms Reykjavíkur sem dæmdi ummæli sem hann lét falla í garð fyrirtækisins dauð og ómerk.

Hafa stefnt Al­mennri inn­heimtu og eig­anda fé­lagsins

Neytendasamtökin hafa stefnt lögmanninum Gísla Kristbirni Björnssyni, fyrirtæki hans Almennri innheimtu ehf. og tryggingafélaginu Verði vegna smálánainnheimtu. Málið var tekið fyrir í Héraðsdómi Reykjavíkur í gær.

Fella niður vexti smálána í vanskilum

BPO Innheimta hefur keypt allt kröfusafn Kredia, Hraðpeninga, Smálána, 1909 og Múla en öll fyrirtækin eru í eigu smálánafyrirtækisins eCommerce 2020.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.