Lífið

Idol hefst í kvöld: Hver mun feta í fót­spor Kalla Bjarna, Hildar Völu, Snorra og Hröfnu?

Elma Rut Valtýsdóttir skrifar
Hver verður fimmta Idolstjarnan?
Hver verður fimmta Idolstjarnan?

Biðin er á enda því leitin að næstu Idolstjörnu Íslands hefst í kvöld. Þrettán ár eru liðin síðan Idol var haldið síðast á Íslandi. Það er því komin upp splunkuný kynslóð af hæfileikaríkum keppendum sem við fáum að kynnast í kvöld.

Framleiðendur þáttanna ferðuðust um allt land í sumar og héldu prufur fyrir áhugasama þátttakendur. Úr þeim prufum voru valdir tæplega hundrað keppendur sem komust áfram í dómaraprufurnar.

Í fyrstu þremur þáttunum fáum við að fylgjast með þessum keppendum spreyta sig fyrir framan þau Birgittu Haukdal, Herra Hnetusmjör, Bríeti og Daníel Ágúst.

Ferðalagið heldur svo áfram í Salnum í Kópavogi þar sem valdir verða þeir átta keppendur sem munu syngja fyrir þjóðina í beinum útsendingum. Beinu útsendingarnar fara fram í glæsilegu stúdíói í Gufunesi þar sem stórar útsendingar á borð við Söngvakeppnina og Allir geta dansað hafa farið fram.

Baldur Kristjánsson

Fyrsta Idolstjarnan: Sjómaðurinn Kalli Bjarni

Idol var haldið í fyrsta sinn hér á landi árið 2003. Þá hafði keppnin farið sigurför um heiminn og var áhuginn því gríðarlegur. Í dómnefnd sátu þau Bubbi Morthens, Sigga Beinteins og Þorvaldur Bjarni. Um 1400 manns skráðu sig í prufur og freistuðu þess að verða fyrsta Idolstjarna Íslands.

Þeir keppendur sem komust alla leið í beinar útsendingar í Vetrargarðinum urðu sannkallaðar stjörnur hér á landi á þessum tíma. Það voru þau Jón Sigurðsson, Kalli Bjarni og Anna Katrín sem kepptust um sigursætið í lokaþættinum. Að lokum var það Kalli Bjarni, sjómaðurinn í rauða og hvíta blómajakkanum sem varð fyrsta Idolstjarna Íslands.

„Ég man nákvæmlega eftir augnablikinu þegar nafnið mitt var kallað. Þetta var alveg ólýsanleg tilfinning,“ sagði Kalli Bjarni í samtali við Vísi fyrir skömmu. Kalli starfar enn við tónlist og gaf síðast út lag fyrir tveimur árum síðan. Hann er nú hættur á sjónum til þess að einbeita sér alfarið að tónlistinni og er von á nýju efni frá honum á næstunni. 

Önnur Idolstjarnan: Reykjavíkurmærin Hildur Vala

Keppnin naut slíkra vinsælda hér á landi að ákveðið var að halda hana aftur ári síðar. Aðsóknin var alveg jafn mikil og árið áður og ljóst að Ísland hafði að geyma mikið af hæfileikaríkum einstaklingum. Í úrslitaþáttunum fengum við meðal annars að kynnast Hildi Völu, Heiðu Ólafs og Davíð Smára. Að lokum var það Hildur Vala sem stóð uppi sem sigurvegari.

Sjá: 14 dagar í Idol: Hildur Vala hafði rétt fyrir sér

Hildur hefur starfað í tónlistinni síðan þá. Hún menntaði sig í jazzsöng og hefur gefið út þrjár sólóplötur. Síðustu ár hefur hún svo einbeitt sér að tónlistarkennslu.

Þriðja Idolstjarnan: Hvíti kóngurinn Snorri Snorrason

Ári síðar var Idol haldið í þriðja sinn. Þá höfðu verið gerðar breytingar á dómnefndinni. Þorvaldur Bjarni sat ekki lengur í dómnefnd en hans í stað komu tónlistarmennirnir Páll Óskar og Einar Bárðar.

Í þessari þriðju þáttaröð kynntumst við keppendum eins og Snorra, Ínu Valgerði, Bríeti Sunnu og Ingó. Eftir glæsileg úrslit í Vetrargarðinum var það Snorri Snorrason eða „Hvíti kóngurinn“, eins og hann var gjarnan kallaður, sem stóð uppi sem þriðja Idolstjarna Íslands.

Í kjölfarið gaf Snorri út sólóplötuna Allt sem ég á. Í dag starfar hann sem tónlistarmaður og upptökustjóri.

Fjórða Idolstjarnan: Sveitastúlkan Hrafna

Keppnin var svo ekki haldin aftur fyrr en árið 2009. Rúmlega tvö þúsund manns skráðu sig til leiks það árið og því ljóst að áhuginn var ennþá gríðarlegur. Splunkuný dómnefnd var kynnt til leiks, en það voru þau Selma Björns, Björn Jörundur og Jón Ólafsson.

Í úrslitaþættinum stóðu aðeins tvær ungar stúlkur eftir, þær Hrafna Hanna og Anna Hlín. Að lokum var það Hrafna sem stóð uppi sem sigurvegari.

Sjá: 10 dagar í Idol: „Ég held að þú sért popp­stjarna dul­búin sem barna­pía“

Það hefur farið nokkuð lítið fyrir Hröfnu síðan hún sigraði Idolið. Hún er búsett á Neskaupstað þar sem hún hefur tekið þátt í uppsetningu á hinum ýmsu tónlistarsýningum.

Leitin að fimmtu Idolstjörnunni hefst í kvöld

Í kvöld fáum við að kynnast þeim keppendum sem freista þess að feta í fótspor Kalla Bjarna, Hildar Völu, Snorra og Hröfnu. Kynnirinn Aron Mola lét hafa það eftir sér eftir dómaraprufurnar að hann teldi sig vera búinn að koma auga á næstu Idolstjörnu. Það væri rosalega mikið af hæfileikaríkum einstaklingum en nokkrir keppendur bæru þó höfuð og herðar yfir aðra.

Það er þó ekki nóg að geta sungið, því sviðsframkoma og útgeislun hafa einnig mikið vægi. Dómararnir þurfa að fylgja sínu innsæi þegar kemur að því að ákveða hvort keppandi eigi að komast áfram eða ekki.

Dómararnir fylgja hjartanu en einn verður harðari en hinir

„Það kemur einhver og stendur sig alveg hræðilega illa en þú sérð eitthvað „potential“, sérð eitthvað þarna á bak við. Þú sérð eitthvað sem þú ætlar að trúa á og treysta á og vilt koma manneskjunni áfram. Fólkið heima á ábyggilega eftir að verða bara, WHAT!,“ sagði dómarinn Birgitta Haukdal í viðtali á dögunum.

Daníel Ágúst tók undir orð Birgittu þegar hann sagðist ætla að láta iðrin og tilfinningarnar um að dæma.

Kynnirinn Sigrún Ósk sagði í viðtali á dögunum að það ætti eflaust eftir að koma áhorfendum á óvart hvaða dómari væri harðastur við keppendur. Við munum þó komast að því í kvöld þegar veislan hefst loksins klukkan 19:00 á Stöð 2.


Idol verður á Stöð 2 á föstudagskvöldum í vetur. Fleiri hundruð söngvarar spreyttu sig í áheyrnaprufunum en að lokum mun einn standa uppi sem sigurvegari. Fyrsti þáttur fer í loftið föstudagskvöldið 25. nóvember. 


Tengdar fréttir

1 dagur í Idol: Eftir­minni­legir kepp­endur úr fyrstu þátta­röð

Idol Stjörnuleit var haldin í fyrsta sinn hér á landi árið 2003. Þá hafði þátturinn farið sigurför um heiminn og áhuginn hér á landi því gríðarlegur. Um 1400 mans skráðu sig í áheyrnarprufur og freistuðu þess að verða fyrsta Idolstjarna Íslands.

5 dagar í Idol: Svíður enn að hafa til­kynnt rangan keppanda

Þau eru ansi stór fótsporin sem þau Aron Mola og Sigrún Ósk þurfa að feta í í nýrri þáttaröð Idol sem hefur göngu sína á föstudaginn. Kynnarnir Simmi og Jói settu mikinn svip á fyrri þáttaraðir, svo mikinn að þeir voru notaðir sem fordæmi fyrir Idol kynna í öðrum löndum.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.