„Lífið hljóp bara frá mér“

Linda lýsir því hvernig of mikil vinna tók sinn toll af henni hér áður fyrr og hafði áhrif á allt hennar líf.

Þar á meðal ástarsambönd. En nú er hún búin að snúa stöðunni við og er alsæl. Vala Matt fór fyrir Ísland í dag og ræddi við Lindu sem einnig sagði henni frá all sérstökum sjúkdómi sem hún er að kljást við þar sem hún nær ekki að grennast þrátt fyrir mjög heilsusamlegt líferni en hún heldur sjúkdómnum niðri með því að borða rétt, hreyfa sig og sofa vel.

„Ég ólst þannig upp að foreldrar mínir voru báðir klipparar og vinnualkar og mér þótti þetta bara eðlilegt. Ég stóð í tíu, tólf tíma á dag og borðaði ekkert og settist ekkert niður. Það var bara svo gaman að ég fattaði ekki að þetta væri ekki eðlilegt fyrir en ég klessti á vegg,“ segir Linda og heldur áfram.

„Það var eitt skipti þar sem ég fékk sjálfsofnæmi og allt í einu fór húðin á mér að fara í svona blöðrur og ég skildi ekkert hvað væri að en þá var ég búin að eyðileggja skjaldkirtilinn úr vinnu. Þannig að ég er búin að vera á skjaldkirtilshormónum í tuttugu og tvö ár. Svo var einu sinni þegar ég var með síðasta kúnna fyrir jól. Þá var heimilislæknirinn minn búinn að segja mér frá Hveragerði til að fara í hvíld. Hann hafði sagt mér að fara í hvíld þar sem hendurnar á mér voru hættar að virka. Þegar ég var með síðasta kúnnann fyrir jól þá gat ég ekki haldið á blásaranum og festi hann undir hendurnar á mér og hristi mig einhvern veginn til að þurrka hárið.“

Hún segist hafa farið í kjölfarið í hvíldarinnlögn í Hveragerði.

„Nokkrum árum seinna þurfti ég að fara í aðgerð og ég er búin að láta skrapa úr öxlunum og ég er er betri í dag en ekkert alveg frábær,“ segir Linda en vinnan hafði einnig áhrifa á hennar persónulega líf.

„Þegar maður er með mikla ástríðu frá vinnunni sinni og lifir fyrir að vinna og finnst þetta svo æðislega skemmtilegt. Þegar ég kom heim þá talaði ég bara um vinnuna og vinnan komst bara að. Ég áttaði mig ekki á því að maki manns á sínum tíma nennti ekkert endilega að hlusta bara á tal um vinnuna mína allan daginn eða öll kvöld. Þetta hafði eðlilega áhrif á mitt samband og ég sé það í dag, en ég sá þetta ekki þá. Svo vaknar maður bara upp fertugur og hugsar, lífið hljóp bara frá mér.“

Lítt þekktur sjúkdómur

Linda segist svona eftir á hafa viljað fá þessa vakningu frekar um þrítugt en fertugt.

„Mér finnst ég hefði átt að gefa samböndunum mínum meiri tíma. Vera meira til staðar og ekki vinnuna bara endalaust heima. Ég er bara 47 ára, það er nóg eftir. Ég er bara í dag að skoða í kringum mig og opin fyrir því að hitta einhvern.“

Linda segist hafa fjárfest í hárheildsölu og þremur mánuðum seinna fjárfesti hún í hárgreiðslustofu. Þetta hafi haft það í för með sér að hún var í raun í vinnunni allan sólarhringinn og tók að sér allt of mikið.

„Ég sé ekkert eftir þessu en ég sé núna hvað þetta var mikil vitleysa að gera þetta bara einn. Í dag er ég með heildsöluna enn þá en ég ætla segja hana,“ segir Linda sem er enn eigandi af hárgreiðslustofunni Hárrétt og hefur verið að minnka við sig vinnuna þar.

„Það var í raun læknir sem skipaði mér að gera það,“ segir Linda sem hefur að undanförnu verið að vinna einnig fyrir Stöð 2, Disney +, tónleikahaldara og fleiri.

„Ég fylgi Birgittu Haukdal, er hárgreiðslukonan hennar og er síðan með alla dómarana í Idol-inu fyrir utan Bríet, það er önnur kona að vinna með henni.“

Linda hefur einnig verið að kljást við sjúkdóm sem er lítt þekktur.

„Það er nú mjög stutt síðan sem ég vissi af þessum sjúkdóm. Ég fór í æðaaðgerð og þegar ég var mætt, stóð í dyrunum og læknirinn sagði við mig, út með hendurnar. Hann sagði þá strax, heyrðu þú ert með Lipoedema. Þetta er í raun fitubjúgur og vatnið sem kemur inn í líkaman festist í fitufrumunum og ég hef bara alla tíð verið svona. Ég fór að skoða myndir og hef alltaf verið í íþróttum en alltaf verið svona þétt um lærin. Ég hef oft hugsað af hverju ég nái ekki að vera eins og „hinar“ stelpurnar en þá er þetta bara málið. Þetta er ættarsjúkdómur sem leggst í kvenlegg. Það fyrsta sem þú lest þegar þú google-ar þetta er að þetta er ekki offitusjúkdómur.“

Hér að neðan má sjá innslagið í heild sinni.