Hjörtur frá Amazon til Lucinity

Þetta kemur fram í tilkynningu frá Lucinity, en fyrirtækið smíðar hugbúnað til varnar peningaþvætti. Hjörtur mun hafa yfirumsjón með allri tækni og hugbúnaðarþróun Lucinity og styðja við frekari vöxt þess.

„Hjörtur snýr nú aftur til Íslands eftir að hafa starfað í Bandaríkjunum hjá tæknirisanum Amazon síðustu átta ár. Hjá Amazon bar hann ábyrgð á myndbandsauglýsingakerfi allra miðla í eigu fyrirtækisins en þar heyra undir þekkt vörumerki á borð við Prime Video, Twitch og IMDB. Síðastliðin 17 ár hefur Hjörtur sankað að sér reynslu við leiðtogastörf í hönnun og innleiðingu dreifstýrðra hugbúnaðarkerfa sem þjóna milljónum viðskiptavina. Fyrir tíma sinn hjá Amazon sinnti Hjörtur fjölbreyttum hlutverkum í hugbúnaðarþróun hjá fyrirtækjunum Ubisoft og CCP.

Hjörtur tekur sæti í framkvæmdarstjórn Lucinity og ber ábyrgð á tæknistefnu og hugbúnaðarteymum fyrirtækisins. Teymin undir hans stjórn munu halda áfram að leggja ofuráherslu á áframhaldandi uppbyggingu leiðandi kerfis í vörnum gegn peningaþvætti sem eykur skilvirkni og skalanleika fjármálastofnanna um allan heim,“ segir í tilkynningunni.