Innlent

Róleg nótt hjá björgunarsveitunum miðað við nóttina þar á undan

Fanndís Birna Logadóttir skrifar
Á Austfjörðum rifnuðu tré upp með rótum. 
Á Austfjörðum rifnuðu tré upp með rótum.  Aðsend/Stefanía Hrund Guðmundsdóttir

Björgunarsveitir sinntu einhverjum minniháttar verkefnum í nótt en þó ekkert í samanburði við aðfaranótt sunnudags. Björgun ferðamanna í Möðrudalsöræfum, vatnstjón á Akureyri og foktjón á Austfjörðum voru meðal helstu verkefna. 

Aftakaveður var á austanverðu landinu í gær og heldur lægðin sem olli veðrinu áfram að nálgast landið en hún er farin að grynnast og missa kraft sinn. Appelsínugular viðvaranir eru enn í gildi á Suðausturlandi og Austfjörðum og verða þær í gildi til klukkan þrjú í dag. Á Austurlandi er sömuleiðis gul viðvörun í gildi til klukkan þrjú. 

Karen Ósk Lárusdóttir, verkefnastjóri aðgerðarmála hjá Landsbjörg, segir nóttina hafa verið heldur rólegri miðað við aðfaranótt sunnudags. Eitthvað var um smávægileg útköll en engin stór mál. Verið er að taka saman fjölda mála eftir helgina en að sögn Karenar höfðu björgunarsveitir farið í hátt í 200 útköll síðast þegar hún athugaði. 

Ferðamenn í ógöngum í Möðrudal, gríðarlegt rok á Austfjörðum og vatnstjón á Akureyri

Rauð viðvörum var í gildi á Austfjörðum í gærkvöldi og var þar mikill vindur en mesta hviðan mældist í Hamarsfirði, 64 metrar á sekúndu. „Það er allt í skrúfunni, það er bara svoleiðis,“ sagði formaður aðgerðastjórnar björgunarsveita á Austurlandi þegar fréttastofa náði tali af honum í gær. 

Björgunarsveitir voru kallaðar út að Möðrudalsöræfum í gær þar sem rúmlega sjötíu erlendir ferðamenn sátu fastir. Vilhjálmur Vernharðsson, staðarhaldi í Fjalladýrð í Möðrudal, taldi að á þriðja hundrað ferðamanna sem sátu fastir á þjóðveginum hafi verið komið til aðstoðar fyrri partinn í gær. 

Mikið hvassviðri var, slydda og krap, auk grjótfoks. Meirihluti þeirra ferðamanna sem þurfti að koma til aðstoðar var á illa búnum bílum miðað við veðuraðstæður. Veðrið hafi verið verra en veðurspár gerðu ráð fyrir.

Annars staðar á Austfjörðum var vindhraðinn gríðarlegur þar sem tré rifnuðu upp með rótum, þar á meðal imm sjötíu ára gömul reynitré á Seyðisfirði. Sömu sögu mátti segja frá Reyðarfirði og Eskifirði.

Á Akureyri gekk síðan sjór á land í aftakaveðrinu en samblanda af öflugri norðanátt og hárri sjávarstöðu gerði það að verkum að sjór átti greiða leið upp á land á neðsta hluta Oddeyrinnar. 

Í viðtali við fréttastofu sagði Stefán Þór Guðmundsson í húsnæði Trésmiðjunnar Aspar að það væri allt á floti. „Þetta er gríðarlegt tjón. Það eru allar vélar og töskur bara á kafi í vatni,“ sagði Stefán um klukkan eitt í gær. 

Þá hafi mikið tjón orðið annars staðar en rafmagnslaust var á Akureyri, og víðar á landinu, auk þess sem fráveitukerfin réðu ekki við vatnsflauminn. 


Tengdar fréttir

Lægðin heldur að nálgast landið aftur en farin að grynnast

Lægðin sem olli aftakaveðri á austanverðu landinu í gær er nú stödd 350 kílómetra norðaustur af Langanesi og er á leið suðsuðaustur. Lægðin er því heldur að nálgast landið, en á móti kemur að hún er farin að grynnast og missa kraft sinn.

Mesta hviðan mældist 64 metrar á sekúndu

Óhætt er að segja að fyrsta haustlægðin hafi skollið á landinu með hvelli, ekki síst á Austfjörðum, þar sem vindstyrkur mældist mjög hár víða. Mesta hviða dagsins mældist í Hamarsfirði, 64 metrar á sekúndu. Veður lægir ekki á Austfjörðum fyrr en annað kvöld.

„Þetta var eins og það gerist verst“

Búið er að koma öllum þeim ferðamönnum sem fastir voru á Möðrudalsöræfum í öruggt skjól. Rúmlega sjötíu erlendir ferðamenn leituðu skjóls í Fjalladýrð í Möðrudal. Staðarhaldarinn þar segir að veðrið á svæðinu hafi verið mun verra en veðurspár sögðu til um.

Fyrsta haust­lægðin skall með krafti á landið

Björgunarsveitir hafa haft í nógu að snúast í dag við að bjarga ferðamönnum sem sátu fastir í bílum sínum í veðurofsanum. Rúður hafa brotnað í bílum og tré rifnað upp frá rótum. Það flæddi yfir götur og inn í hús á Akureyri og á stórum hluta landsins varð rafmagnslaust í dag.

„Veður­spáin lítur ekki vel út“

Rauð viðvörun vegna veðurs hefur nú tekið gildi á Austfjörðum. Gert er ráð fyrir ofsaveðri með vindhviðum allt að 45 metrum á sekúndu. Hættustig almannavarna hefur verið virkjað og björgunarsveitir fyrir austan eru í viðbragðsstöðu. Almannavarnir hafa biðlað til almennings um að hjálpa þeim að koma skilaboðum um hið slæma veður til ferðamanna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.