Bílar

Stefnt á umhverfisvænasta bílaþvott sem völ er á

Kristinn Ásgeir Gylfason skrifar
Land Rover Discovery í þvotti.
Land Rover Discovery í þvotti.

Löður rekur 15 bílaþvottastöðvar á Íslandi og á hverju ári fara um 250 þúsund bílar í gegnum þvott á stöðvum fyrirtækisins. Í bílaþvotti þarf að nota sápur og önnur hreinsiefni ásamt því að nota mikið af vatni.

„Löður vill sýna samfélagslega ábyrgð með því að bjóða upp á hágæða aðstöðu og þjónustu í bílaþvotti þannig að bílaþvottur fari frekar fram á viðurkenndum stöðvum heldur en við heimahús. Til mikils er að vinna því sápur og hreinsiefni sem notuð eru við bílaþvott heima fyrir fara beint í niðurföll og þaðan út í næsta læk, á eða sjó. Á stöðvum Löðurs fer þvotturinn fram í lokuðu rými þar sem öllu þvottavatni er safnað í sand- og olíugildrur. Skiljur hreinsa svo sápur og hreinsiefni úr þvottavatninu þannig að lágmarks hætta er á að mengun berist út í ofanvatnskerfi eða grunnvatnið okkar. Að lokum er affallið sogið upp úr gildrunum og úrganginum fargað af viðurkenndum móttökuaðilum,“ segir Elísabet Jónsdóttir framkvæmdastjóri Löðurs.

Löður stígur nú stór skref í að minnka notkun á hreinsiefnum og vatni á sínum stöðvum. „Við berum öll ábyrgð á okkur nánasta umhverfi og því að minnka okkar umhverfisáhrif. Löður leggur mikla áherslu á að gera bílaþvottastöðvar sínar stöðugt umhverfisvænni. Það er til dæmis þrisvar sinnum minna magn af vatni sem fer í að þvo bílinn á snertilausu og sjálfvirku stöðvunum okkar en að þrífa hann með vatnskústi á þvottaplani. Sem dæmi tókum við stóra ákvörðun í fyrra og tókum allar ruslatunnur úr þvottabásum Löðurs með frábærum árangri. Með þessari breytingu er auðvelt að flokka allt rusl sem fellur til í rekstri Löðurs en áður var öllu hent í einn gám, undir almennt rusl. Við erum stolt af þessari vegferð og markmið okkar er að gera enn betur í umhverfismálum,“ segir Elísabet.

Ein af þvottastöðvum Löðurs.

En betur má ef duga skal og fyrirtækið stefnir á að nota umhverfisvænni hreinsiefni í rekstrinum. „Löður leitar stöðugt leiða til að minnka umhverfisáhrif starfseminnar og vinnur nú hörðum höndum að því að innleiða ný hreinsiefni á þvottastöðvunum sem lágmarka neikvæð áhrif á umhverfið,“ segir Elísabet. Hún bætir við að þá séu allar plastumbúðir undan hreinsiefnum sem falla til við rekstur Löðurs flokkaðar og endurunnar í samstarfi við Pure North í Hveragerði, en með því er Löður að styðja við uppbyggingu hringrásarhagkerfisins á Íslandi og lágmarka kolefnisspor sinnar úrgangsmeðhöndlunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.