Brynjólfur telur á­sakanir á hendur sér með svæsnustu per­sónu­á­rásum ís­lenskrar stjórn­mála­sögu

„Ásakanir Málfríðar Þórðardóttir, Hannesínu Scheving og Tinnu Guðmundsdóttur á hendur okkur Jóni Hjaltasyni eru algjörlega tilhæfulausar og geta flokkast undir svæsnustu pesónuárásir í íslenskri stjórnmálasögu,“ segir Brynjólfur en vænta má yfirlýsingar frá honum innan tíðar.

Flokkur fólksins skelfur og nötrar eftir að þrjár konur í forystusveitinni á Akureyri stigu fram í gær og sökuðu karlpening flokksins nyrðra um niðrandi framkomu í sinn garð; einelti, hótanir og í sömum tilfellum hafi verið um kynferðislega áreitni að ræða. Ásakanirnar voru ekki settar fram gegn neinum nafngreindum aðilum en ekki er um marga sem til greina koma.

Atburðaráðsin var hröð í gær en nú liggur fyrir að atburðir sem um ræði eigi sér talsvert langan aðdraganda.

Inga vildi að Brynjólfur stigi til hliðar

Að sögn Brynjólfs vildi Inga Sæland, formaður flokksins, að hann stigi til hliðar sem bæjarfulltrúi flokksins eftir veikindi sem hann hafði átt við að stríða fyrr á árinu. Hún hafi hringt gagngert í sig fyrir viku síðan til að tilkynna þá ákvörðun sína. „Að ég færi í veikindaleyfi einn, tveir og þrír eða yrði rekinn úr flokknum.“ En hún hafi þá dregið það til baka samdægurs. Brynjólfur metur það svo í samtali við fréttastofu að Jakob Frímann Magnússon, þingmaður kjördæmisins, hafi hlutast til um að Inga breytti um kúrs í því máli.

Málið sprakk hins vegar fyrst út í gær en þá birti Guðmundur Ingi Kristinsson, varaformaður flokksins, yfirlýsingu á Facebook-síðu sinni þar sem hann greindi frá því að hann hefði óskað eftir stjórnarfundi þar sem teknar yrðu fyrir ásakanir um andlegt ofbeldi og kynferðislegt áreiti sem kvenleiðtogar flokksins á Akureyri segðu sig hafa mátt sæta. Strax í kjölfarið stigu konurnar þrjár áðurnefndar fram.

Telur framgöngu Guðmundar Inga ámælisverða

Vísir ræddi í gær meðal annarra við Jón Hjaltason, þriðja mann á lista flokksins á sveitarstjórnarstiginu á Akureyri, en ásakanirnar hlutu að beinast að honum auk annarra. En hann vísaði þessum ásökunum alfarið á bug. Það gerir Brynjólfur nú einnig.

„Við munum óska eftir lögreglurannsókn á aðdraganda þessarar aðfarar,“ segir Brynjólfur og bætir því við að viðbrögð og framganga Guðmundar Inga varaformanns séu með algjörum eindæmum sé litið til sambærilegra mála.

Inga Sæland, formaður flokksins, boðaði til fundar aðalstjórnar Flokks fólksins, sem fram fór strax í gærkvöldi. Hún þvertók fyrir, að loknum þeim fundi, að nokkur í forystusveit flokksins á Akureyri hafi verið sakaður um kynferðislegt áreiti. Inga segir dapurt að því hugtaki hafi verið slengt fram í ásökunum þriggja kvenna innan flokksins því nú liggi allir undir grun.

Fréttaflutningur langt fyrir neðan öll velsæmismörk

Brynjólfur segir að „fundirinn“ hafi hafnað því að hlusta á sjónarmið hans og Jóns, sem Jón þó óskaði sérstaklega eftir. Þá hefur Brynjólfur sitthvað að athuga við umfjöllun fjölmiðla um þetta mál.

„Fréttaflutningur sumra fjölmiðla er langt fyrir neðan öll velsæmismörk og myndbirting í ruv.is er meiðandi fyrir afkomendur okkar og kannski þegar búin að valda skaða sem ekki verður bættur.“

Brynjólfur segir aukinheldur að á þessari stundu geti hann ekki séð hvernig þessi „fullkomlega augljósi trúnaðarbrestur“ verði lagfærður:

„Þó að ég sé enn dyggur fylgjandi stefnumála Flokks fólksins get ég ekki átt samleið með áðurnefndum flokkssystrum mínum og ég á ekkert vantalað við fyrr en þær taka orð sín aftur opinberlega,“ segir hann og bætir við að hann hafi ekki mikla trú á því að Inga og stjórn flokksins sé vel til þess fallin að lægja öldurnar á komandi dögum.