Á götunni eftir altjón í bruna

Erla Kristjánsdóttir hafði búið í félagslegri íbúð á vegum Hafnarfjarðarbæjar í þrjú ár þegar eldur kom upp í henni fyrir hálfum mánuði.

„Ég skrapp frá í smá tíma og þegar ég kom til baka var allt brunnið.  Það hafði kviknað í út frá rafmagnshlaupahjóli og það brann allt, ég missti allt í þessu,“segir Erla.

Þetta reddast, ég heyri í þér á mánudaginn

Erla er ekki með innnbústryggingu þannig að persónulegt tjón er gríðarlegt. Hún leitaði eftir aðstoð með að komast inn í annað húsnæði hjá Hafnarfjarðarbæ og segir að sér hafi verið bent á að leigja herbergi á gistiheimili.

„Ég hafði samband við velferðarþjónustu bæjarins og var tjáð þar að ég gæti bara leitað á gistiheimili. Þetta var á föstudegi stuttu fyrir mánaðarmót og ég átti ekki pening fyrir því. Ég lét vita af því og starfsmaðurinn  sagði þá við mig þetta reddast, ég heyri í þér á mánudaginn. Það reddaðist ekkert því það kostar að minnsta kosti þrjátíu þúsund að fara á gistiheimili og ég átti ekki fyrir því og á ekki fyrir því heldur núna. Ég missti allt og allur peningurinn fer bara í að kaupa mér brýnustu nauðsynjar eins og fatnað og annað af þeim toga,“ segir Erla sem starfar á sambýli.

Erla fékk tímabundið inni hjá systur sinni sem býr í lítilli íbúð ásamt fjölskyldu sinni. Hún hefur leitað að leiguíbúð síðan bruninn varð en ekki fengið neina á viðráðanlegu verði. Hún er ekki vongóð um að fá félagslega íbúð í bráð því hún hafi fengið þau svör að það taki mánuði að fá aftur slíka íbúð hjá Hafnarfjarðarbæ.

„Kisan gæti enn verið á lífi“

Erla segir að lögreglan hafi leyft sér að fara inn í íbúðina sama dag og eldsvoðinn varð en hún hafði miklar áhyggjur af kettinum sínum. Hann fannst ekki þá en hún segist hafa óskað eftir að fá að kíkja eftir honum dagana á eftir en verið neitað.  Henni tókst loks eftir nokkra daga að fá leyfi til að fara inn í íbúðina til að taka saman dótið sitt og fann þá köttinn sinn dauðan í einu herberginu.

„Ég bað um að fá að fara inn í íbúðina dagana á eftir bara til að tryggja að kötturinn væri ekki þarna inni en ég sá förin eftir loppurnar hans á gluggakörmum fyrir utan. Löggan neitaði alltaf. Loks þegar ég komst svo inn eftir nokkra daga fannst kötturinn í einu herberginu, dáinn. Bara ef þeir hefðu leyft mér að labba einn hring dagana á eftir brunann, þá gæti kisan enn verið á  lífi,“ segir Erla hrygg í bragði.

Engin vill geyma brunadót

Erla segist hafa fengið tvo daga til að taka saman dót úr íbúðinni en komi því ekki í neina geymslu. 

„Ég geymi dótið í skotti á bíl, þetta er líklega allt ónýtt en mig langar samt að athuga hvort ég geti notað eitthvað af þessu. Það vill engin geymsla taka við þessu þar sem þetta kemur úr bruna,“ segir hún

Erla segir þetta mikið áfall. 

„Þetta er bara hræðilegt ég missti allt og fæ hvergi íbúð,“ segir hún.

Aðstandendur Erlu benda á að hægt er að styrkja hana með því að leggja inn á söfnunarreikning hennar:

Reikningsnúmer: 0317–13-001303

Kennitala: 130387-3229