Erlent

Hafa náð undra­verðum árangri á nokkrum dögum

Samúel Karl Ólason skrifar
Úkraínskur hermaður á ferðinni á bryndreka í Kharkív-héraði. Úkraínskir hermenn þar hafa tilefni til gleði, miðað við gengi þeirra undanfarna daga.
Úkraínskur hermaður á ferðinni á bryndreka í Kharkív-héraði. Úkraínskir hermenn þar hafa tilefni til gleði, miðað við gengi þeirra undanfarna daga. Getty/Metin Aktas

Úkraínumenn hafa náð umfangsmiklum árangri í gagnárás gegn Rússum í Kharkív-héraði í norðurhluta landsins. Hersveitir Úkraínu eru sagðar komnar minnst fimmtíu kílómetra í gegnum varnir Rússa á einungis þremur dögum og hafa frelsað tugi þorpa og bæja sem hafa verið í haldi Rússa frá því innrásin hófst.

Þá eru Úkraínumenn þegar byrjaðir að skera á mjög mikilvægar birgðalínur Rússa á svæðinu. Vendingar sem þessar hafa ekki orðið á víglínunum í Úkraínu frá því snemma í innrásinni.

Vólódímír Selenskí, forseti Úkraínu, sagði í ávarpi sínu í gærkvöldi að rúmlega þúsund ferkílómetrar af úkraínsku landsvæði hefðu verið frelsaðir. Forsetinn birti svo myndband sem sýndi úkraínska hermenn frá borginni Balakliya sem Rússar voru reknir frá á undanförnum dögum.

Þessir hermenn tilkynntu Selenskí í myndbandinu að búið væri að framfylgja skipuninni um frelsun borgarinnar.

Annað myndband frá borginni hefur vakið mikla athygli en það sýnir íbúa Balakliya fagna komu úkraínskra hermanna.

Ráðamenn í Rússlandi eða varnarmálaráðuneyti Rússlands hafa enn lítið sem ekkert sagt um gagnárás Úkraínumanna.

Eins og áður hefur komið fram virðist sem markmið Úkraínumanna í Kharkív sé að ná borginni Kupyansk og þannig skera á birgðaleiðir Rússa í Izyum. Borgin féll í hendur Rússa í mars og er ein af þungamiðjum herafla Rússlands í austurhluta Úkraínu. Útlit er fyrir að Úkraínumenn séu þegar komnir að úthverfum Kupyansk.

Fregnir hafa borist af því að bardagar séu hafnir í jaðri borgarinnar.

Sjá einnig: Rýnt í stöðuna í Úkraínu - Komnir langt í gegnum varnir Rússa í Kharkív

Það er miðað við rússneska bloggara sem sérhæfa sig í málefnum rússneska hersins. Það samfélag er tiltölulega stórt og mjög virkt í Rússlandi. Vestrænir sérfræðingar sem fylgjast meðal annars með myndefni sem úkraínskir og rússneskir hermenn birta á samfélagsmiðlum hafa gefið svipaða mynd af stöðunni í Kharkív.

Hér að neðan má sjá kort frá því í gær sem sýnir sókn Úkraínumanna í mjög grófum dráttum. Áðurnefndir rússneskir bloggarar segja Úkraínumenn hafa sótt lengra en kortið hér að neðan gefur til kynna, enda er það sextán klukkustunda gamalt.

Takist Úkraínumönnum að skera á þessar birgðalínur og halda því svæði sem þeir hafa frelsað frá Rússum í vikunni, gæti það haft gífurleg áhrif á getu rússneska hersins í austurhluta Úkraínu. Í það minnsta þar til Rússar mynda aðrar birgðalínur.

Allar líkur á gagn-gagnárás

Rússar hafa verið að flytja nýja herdeild til Úkraínu en sú er talin skipuð allt að tuttugu þúsund hermönnum. Líklegt er að sú herdeild, sem kallast „Þriðji herinn“ verði sendur til Kharkív og muni verða notuð til að reyna að stöðva sókn Úkraínumanna og reka úkraínska herinn aftur á bak í héraðinu.

Óljóst er hve marga hermenn Úkraínumenn eru með á svæðinu og hve máttugir þeir eru þar en mögulegt er að þeir hafi fundið veikleika á víglínu Rússa og nýtt sér hann með tiltölulega fámennum sveitum. Þá er sömuleiðis lítið vitað um mögulegt mannfall Úkraínumanna í héraðinu.

Framvindan í Kharkív og víðar í austurhluta Úkraínu, veltur mikið á því hvernig óhjákvæmileg gagn-gagnárás Rússa gengur á næstu dögum og vikum.

Rússneska ríkisfréttaveitan RIA birti í morgun mydnband sem á að sýna rússneskan liðsauka á leið til Kharkív.


Tengdar fréttir

Rýnt í stöðuna í Úkraínu: Komnir langt í gegnum varnir Rússa í Kharkív

Hersveitir Úkraínu hafa sótt töluvert fram gegn Rússum Kharkív-héraði í norðurhluta Úkraínu á undanförnum dögum. Það gerðu þær með skyndisókn sem virðist hafa komið Rússum á óvart og Úkraínumenn hafi nýtt sér það að Rússar fluttu hersveitir til suðurs til að bregðast við sókn Úkraínumanna í Kherson-héraði.

Ógna birgðalínum Rússa í austri

Hersveitir Úkraínu virðast hafa náð þó nokkrum árangri í gagnsókn þeirra í Kharkív-héraði í norðurhluta landsins. Gagnsóknin hófst í gær og virðast Úkraínumenn hafa komið Rússum á óvart, umkringt rússneska hermenn í borginni Balaklia og sótt áfram austur inn á yfirráðasvæði Rússa.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×