Hreinar rekstrartekjur Stefnis, sem samanstanda nánast einvörðungu af umsýslu- og árangurstengdum þóknunum, lækkuðu um 60 milljónir og voru samtals tæplega 1.319 milljónir króna.
Fram kemur í skýrslu stjórnar með nýbirtum árshlutareikningi félagsins að helstu breytingar sem megi rekja til þess að virkar eignir í stýringu lækka á tímabilinu, eftir að hafa hækkað um 58 milljarða á öllu árinu 2021 þegar markaðsaðstæður voru afar hagfelldar, séu að fjárfestingarumhverfi innlendra og erlendra sjóða hafi verið „mjög krefjandi.“
Þannig hafi ávöxtun sjóða í stýringu Stefnis á fyrri árshelmingi 2022 í mörgum tilfellum verið neikvæð sökum markaðsaðstæðna sem má meðal annars rekja til stríðsreksturs í Evrópu, hnökra í aðfangakeðjum heimsins og auknum áhyggjum af verðbólgu og vaxtahækkunum víða í heiminum. „Jákvæða ávöxtun má helst sjá í blönduðum sjóðum sem eru með hátt verðtryggingarhlutfall og öðrum verðtryggðum afurðum,“ segir í skýrslu stjórnar félagsins.
Nær stöðugt útflæði hefur verið úr innlendum verðbréfasjóðum – hlutabréfasjóðum, blönduðum sjóðum og skuldabréfasjóðum – frá innrás Rússa í Úkraínu í lok febrúar sem hefur, ásamt versnandi hagvaxtahorfum og hækkandi verðbólgu, valdið auknum óróa á mörkuðum beggja vegna Atlantshafsins. Á fyrstu sjö mánuðum ársins nemur samanlagt nettó útflæði úr slíkum sjóðum um 15 milljörðum króna, að því er fram kemur í tölum frá Seðlabanka Íslands.
Fram kemur í árshlutareikningi Stefnir að innlausnir umfram sölu á nýjum hlutdeildarskírteinum í sjóðnum Stefnir – Innlend hlutabréf hs., sem er stærsti íslenski hlutabréfasjóðurinn, hafi numið 1.172 milljónum króna á fyrri hluta ársins. Sjóðurinn er í dag um 33,2 milljarðar króna að stærð og hefur skilað 10,15 prósenta ávöxtun á síðustu tólf mánuðum, sem er hæsta ávöxtun allra hlutabréfasjóða opnir almenningi. Frá áramótum er sjóðurinn upp um 1,5 prósent en yfir sama tímabil hefur Úrvalsvísitalan lækkað um rúmlega 18 prósent.
Á fyrri árshelmingi voru stofnaðir þrír nýir sjóðir – Sustainable Arctic Fund, Innlend hlutabréf Vogun og Milti Strategy Fund II – hjá Stefni.
Eigið fé Stefnis stóð í 2,3 milljörðum króna um mitt árið og var eiginfjárhlutfall félagsins rúmlega 57 prósent. Á aðalfundi Stefnis í mars síðastliðnum var samþykkt að greiða úr um 1.456 milljónir króna í arð vegna afkomu síðasta árs.
Í byrjun maí tók Jón Finnbogason við sem framkvæmdastjóri Stefnis en hann hafði áður verið forstöðumaður fyrirtækja innan fyrirtækja- og fjárfestingabankasviðs Arion banka. Tók hann við starfinu af Jóhanni Möller sem var samhliða ráðinn framkvæmdastjóri markaða hjá Arion.
