Kol­beinn æfir með Ty­son Fury: „Sé ekkert því til fyrir­stöðu að ég geti farið alla leið“

Þá hefur Fury gefið út að hann vilji berjast við aflraunamanninn Hafþór Júlíus Björnsson. Vísir tók stöðuna á Kolbeini, hvað hann er að gera í Englandi og hvað hefur drifið á daga hans að undanförnu.

Tyson Fury er með skrautlegri íþróttamönnum síðari ára. Hann hefur talað opinskátt um baráttu sína við þunglyndi og neysly eiturlyfja í kjölfarið. Fury hafði áður lagt hanskana á hilluna og fór í kjölfarið í dimma holu sem hann klóraði sig upp úr með því að byrja boxa á ný. Hann var tiltölulega nýbúinn að vinna heimsmeistaratitil í þungavigt þegar hann kom öllum að óvörum og hætti á nýjan leik.

Fury setti þó ávallt þann varnagla á að hann gæti snúið aftur í einn bardaga ef verðlaunaféð yrði 500 milljónir punda, það gera 83 milljarða íslenskra króna. Það virðist sem sá bardagi gæti orðið að möguleika en Fury myndi mæta Úkraínumanninum Oleksandr Usyk. Sá sigraði Anthony Joshua, samlanda Fury, öðru sinni á dögunum.

Fury lofaði er hann hætti að halda sér í formi og er því duglegur að æfa. Hann kom hins vegar hingað til lands nýverið og þar rakst Kolbeinn á kauða en þeir eru með sama þjálfara, Javan „SugarHill“ Steward. Það hefði aldrei gerst ef Kolbeinn hefði komist til Bandaríkjanna í síðasta mánuði þar sem hann átti að keppa í Detroit.

„Lán í óláni“

Ísbjörninn eins og hann er kallaður í heimi hnefaleikanna er eini íslenski karlmaðurinn sem hefur íþróttina að atvinnu. Hann á að baki tólf bardaga sem allir hafa unnist. Til stóð að 13. bardaginn yrði fyrr í þessum mánuði en því miður féll það upp fyrir.

Kolbeinn segir það „lán í óláni“ að hafa misst bardagann. Hann er í dag staddur á Englandi þar sem hann æfir, meðal annars með Fury, og undirbýr sig fyrir komandi verkefni.

„Það var vesen varðandi vegabréfsáritun, eitthvað sem er búið að leysa núna en það gerðist ekki í tæka tíð og ég missti bardagann frá mér. Þar sem ég fór ekki út þá var ég á Íslandi þegar Tyson kom til landsins. Við hittumst og ég fór með honum og fleirum út að borða, í axarkast og eitthvað fleira. Það má því segja að það hafi verið lán í óláni að missa bardagann í Detroit þó það hafi verið mjög leiðinlegt þegar það kom fyrir.“

„Skaut að honum hvort hann þyrði ekki að boxa við mig“

Þó svo að Kolbeinn og Fury séu með sama þjálfara þá er það nú ekkert sjálfgefið að vera boðið út að æfa með heimsmeistaranum sem er með jafnstóran persónulega og hann er hár í loftinu. Tyson Fury er 2.06 metrar á hæð og tæplega 125 kíló.

„Ég hitti Fury þegar hann var á Íslandi og ég eiginlega skaut að honum hvort hann þyrði ekki að boxa við mig. Eftir það þá bauð hann mér með þeim út að borða og svo að koma út til Englands að æfa með þeim. Hann tók þetta alveg til sín,“ sagði Kolbeinn hlæjandi.

Kolbeinn sjálfur er engin smásmíð og nærri tveir metrar á hæð. Er Fury bara eins og meðalmaður fyrir Ísbirninum frá Íslandi?

„Þegar ég hitti hann fyrst á Íslandi þá hugsaði ég með mér að hann væri ekkert það stór. Svo þegar ég sá hann í ræktinni þá áttaði ég mig kannski aðeins betur á því að hann er ágætlega stór maður. Hann er með svo langar hendur, hann er eins og könguló,“ sagði Kolbeinn og hló aftur.

Fury grínaðist með það þegar hann kom hingað til lands að hann væri að leita að aflraunamanninum Hafþóri Júlíusi Björnssyni. Undanfarið hefur verið umræða um að þessi tvö fjöll af mönnum gætu mætt hvor öðrum í hringnum en Kolbeinn telur það ólíklegt.

„Eins og ég skil hann þá er þessi Hafþór Júlíus bardagi ekkert að fara gerast, en svo veit maður náttúrulega ekkert hvað gerist í framtíðinni.“

Hvað er Kolbeinn samt að gera í Englandi?

„Ég er sem sagt hérna í æfingabúðum hjá Joe Parker, hann er fyrrverandi heimsmeistari og er að fara berjast við Joe Joyce í lok september um WBO-heimsmeistaratitilinn. Þeir fengu mig til að koma og „sparra“ aðeins við hann, til að undirbúa hann fyrir bardagann. Fury bauð mér sem sagt að koma hingað út í þessar æfingabúðir, svo er ég að vinna með honum og Andy Lee sem er þjálfarinn hans Joe.“

Er talið snerist að Fury og mögulegum 500 milljón punda bardaga velti blaðamaður fyrir sér hvort Kolbeinn gæti verið einn af „upphitunarbardögunum“ þó svo að hann væri einnig að keppa í þungavigt, líkt og Fury.

„Það er alveg mögulegt, það er oft svokallað þungavigtar-kort þar sem allir bardagarnir eru í þungavigt. Það er því alveg möguleiki á að reyna á það og sjá hvort það sé hægt en líkurnar eru ekki miklar, svo rosalega margir sem koma og vilja koma að þessu. Svo vilja allir koma sínum mönnum á framfæri.“

„Þeir hafa viku til að setja upp bardaga við Usyk. Það eru 100 prósent einhverjir prinsar tilbúnir að borga fyrir þetta,“ sagði Kolbeinn um mögulegan bardaga Fury og Usyk en ef hann fer fram virðast allar líkur á að það verði í Sádi-Arabíu.

Hefur ekki keppt síðan Covid-19 skall á

„Ég var að undirbúa mig undir bardaga í Bandaríkjunum en í vikunni sem ég átti að berjast þá lokaði allt þar, ég í raun rétt slapp út með síðustu flugunum áður en öllu var skellt í lás,“ segir Kolbeinn en það er ljóst að hann er farið að þyrsta í að komast aftur í hringinn.

„Ég er að fara tala við umboðsmanninn minn á eftir, við ætlum að reyna setja upp eitthvað á næstunni.“

Að lokum var Kolbeinn spurður hvernig staðan á honum væri í dag eftir svo langa pásu þar sem hann væri nú ekkert að verða yngri og hversu langt hann teldi sig geta farið.

„Mér finnst ég miklu tilbúnari að keppa gegn góðum andstæðingum í dag en fyrir Covid-19. Ég hef bætt mig helling að mínu mati. Þó ég hafi ekki verið að keppa þá var ég ekki að taka neinn skaða, ég var ekki að keppa svo ég var ekki að fá nein þung högg í skrokkinn eða höfuðið. Það tikkar allt inn og hefur áhrif á hversu lengi maður getur keppt. Þannig þar sem ég stend núna þá finnst mér ég geta haldið áfram lengur á hæsta „level.“

„Ég sé ekkert því til fyrirstöðu að ég geti farið alla leið,“ sagði Kolbeinn Kristinsson, atvinnumaður í hnefaleikum, að lokum.