Golf

Kylfingar sem gengu til liðs við LIV hóta að höfða mál gegn Evrópu­móta­röðinni

Hjörtur Leó Guðjónsson skrifar
Lee Westwood er einn af þeim kylfingum sem sendi bréfið.
Lee Westwood er einn af þeim kylfingum sem sendi bréfið. Charles Laberge/LIV Golf/via Getty Images

Sextán kylfingar sem tóku þátt á fyrsta móti sádí-arabísku LIV-mótaraðarinnar í golfi hafa hótað því að höfða mál gegn Evrópumótaröðinni, DP World Tour, ef refsingar þeirra fyrir að taka þátt í móti á vegum LIV verða ekki afturkallaðar fyrir klukkan 17 í dag.

Meðal þessara sextán kylfinga eru nöfn á borð við Ian Poulter og Lee Westwood, en hver og einn þeirra var sektaður um rúmar sextán milljónir króna. Þá var þeim einnig bannað að taka þátt í Genesis Scottish Open mótinu, ásamt tveimur öðrum mótum sem haldin eru í samstarfi við PGA-mótaröðina.

Kylfingarnir sextán sendu frá sér opið bréf þar sem þeir biðja Evópumótaröðina að endurskoða refsingarnar. Þá vilja þeir einnig meina að eftir að sambandið milli Evrópumótaraðarinnar og PGA-mótaraðarinnar styrktist hafi Evrópumótaröðin þurft að víkja að einhverju leiti fyrir PGA-mótaröðinni.

„Í síðustu samskiptum okkar við Hr. Pelley sagði hann að allt sem við gerum í lífinu hafi afleiðingar,“ segir í bréfinu og er þá átt við Keith Pelley, forstjóra Evrópumótaraðarinnar.

„Við erum sammála því og við höfum áhyggjur af því að það sem Evrópumótaröðin gerði okkur, LIV-mótaröðinni og golfi í heild, muni hafa slæmar afleiðingar fyrir Evrópumótaröðina. Mótaröð sem okkur þykir mjög vænt um, þrátt fyrir samskipti okkar við hana seinustu daga.

Markmið þessa bréfs er ekki að sundra okkur frekar, heldur til að svara yfirlýsingum mótaraðarinnar og spyrja hana spurninga sem við viljum fá svar við og þurfum að ræða í þaula.

Í stað þess að eyða tíma, orku, fjármunum og einbeitingu í áfrýjanir, lögbönn og kærur, þá biðjum við ykkur, forráðamenn Evrópumótaraðarinnar, að endurskoða nýlegar refsingar og refsiaðgerðir, og biðjum ykkur frekar að einbeita ykkur að því að greiða leið fram á við sem mun nýtast meðlimum Evrópumótaraðarinnar og golfi í heild.

Að lokum biðjum við ykkur að afturkalla sektirnar og bönnin fyrir klukkan 17:00, föstudaginn 1. júlí 2022.

Að auki þá teljum við yfir fimm prósent af meðlimum Evrópumótaraðarinnar og samkvæmt samþykktum hennar köllum við eftir því að þið boðið til fundar með meðlimum mótaraðarinnar til að ræða þessi mikilvægu mál.

Ef ekki, neyðumst við til þess að grípa til annarra aðgerða sem okkur standa til boða til að leiðrétta þetta ranglæti,“ sekir að lokum í bréfinu.

Talsmaður Evrópumótaraðarinnar hefur staðfest að bréfið hafi borist og að vænta megi svars við því í dag.




Fleiri fréttir

Sjá meira


×