Al­gjört risastökk Óli­vers á heims­listanum

Nýr listi var birtur í dag og þar fór Óliver upp um hvorki fleiri né færri en 407 sæti. Þessi bráðefnilegi kylfingur úr Golfklúbbnum Keili er því núna, þrátt fyrir að vera enn 16 ára gamall, kominn upp í sæti 1.243 á heimslista áhugakylfinga.

Gunnlaugur Árni Sveinsson er áfram efstur Íslendinga á listanum en fellur þó niður um átta sæti og er núna í 20. sæti. Gunnlaugur Árni hefur náð langhæst Íslendinga í sögu listans eða 8. sæti.

Fyrir ofan Óliver á heimslistanum eru einnig fjórir aðrir Íslendingar, þeir Aron Emil Gunnarsson í sæti 527, Böðvar Bragi Pálsson í sæti 824, Veigar Heiðarsson í sæti 837 og Kristján Karl Guðjónsson í sæti 993.

Óliver hefur verið að gera frábæra hluti í sumar og eftir sigurinn magnaða í Skotlandi um helgina hafa ýmsar dyr opnast. Þar á meðal dyrnar inn á Jacques Léglise Trophy sem fram fer á Írlandi á föstudag og laugardag. 

Þar verður Óliver í úrvalsliði Evrópu, skipuðu kylfingum 18 ára og yngri, sem mætir úrvalsliði Bretlands og Írlands. Um árlegt mót er að ræða sem er eitt það stærsta í unglingagolfinu í Evrópu.