Lífið

„Ég leyfi mér að dreyma“

Dóra Júlía Agnarsdóttir skrifar
Katla Njálsdóttir er viðmælandi vikunnar í Innblæstrinum.
Katla Njálsdóttir er viðmælandi vikunnar í Innblæstrinum. Saga Sig

Leikkonan og lífskúnstnerinn Katla Þórudóttir Njálsdóttir hefur vakið athygli fyrir sköpunargleði sína í íslensku samfélagi, meðal annars með þátttöku sinni í Söngvakeppni Sjónvarpsins og í hlutverki sínu í sjónvarpsseríunni Vitjanir. Katla leyfir sér að dreyma, reynir alltaf að hafa eitthvað að gera og reynir að hafa húmorinn í fyrirrúmi. Katla er viðmælandi vikunnar í Innblæstrinum.

Innblásturinn er fastur liður hjá Lífinu á Vísi þar sem rætt er við ólíkt fólk um hvað veitir því innblástur í tilverunni og hvaða ráðum þau luma á varðandi andlega heilsu.

Hver ert þú í þínum eigin orðum?

Rauðhærður kaldhæðinn femínisti sem reynir að hafa húmorinn í fyrirrúmi og að taka hlutum ekki of alvarlega. 

Ég er Árbæingur en segist nú alltaf vera hálfur Hólmari líka. Ég leyfi mér að dreyma og reyni alltaf að hafa eitthvað að gera.

Hvað veitir þér innblástur?

Í stuttu máli allt. 

Þá aðallega bíómyndir, þættir, ljósmyndir og tónlist. Það fer síðan eftir því hvað ég hlusta/horfi á. Ef ég er að skrifa eitthvað alvarlegt þá hendi ég mér í kvikmyndatónlist úr stríðsmyndum. Ef það er eitthvað sorglegt þá hlusta ég á Up lagið eða Ásgeir Trausta, samt oftar en ekki eitthvað sem er ekki með texta.

Hvað er þitt besta ráð til að næra andlega heilsu?

Að gera eitthvað listrænt. Ef mér líður illa, vel eða leiðist þá föndra ég, skrifa, mála og þess háttar. Ef mig langar að nota heilann, þá fer ég að skrifa eða gera svona lítil zine. 

Ef ég nenni ekki að nota heilann þá fer ég bara að líma eitthvað dót saman. Eða fer út í garð í nokkurs konar stúdíó þar sem ég bý til skartgripi. Þá aðallega hringa úr gömlum göfflum og skeiðum.

Hvernig er hefðbundinn dagur í þínu lífi?

Vakna seint og er alltof lengi fram úr. Er algjör B manneskja. Tannbursta alltof fast (sorry Máni) og gluða rakakremi í fésið á mér. Ég er vanalega með einhverja dagskrá í símanum mínum því ég er alveg afskaplega gleymin. Húrra mér á milli staða á bjöllunni minni og enda líklegast á spilakvöldi með vinum að spila Bezzerwizzer, alltaf Bezzerwizzer.

Uppáhalds lag og af hverju?

Þetta er rosaleg spurning, það fer eftir dögum og skapi hvaða lag er fyrir valinu. Tveir koddar með JóaPé og Króla ratar mjög oft í auxið í bílnum. Happier than Ever með Billie er líka í annarri vídd þegar það er spilað í botn. Síðan er stundum Vetur með Vivaldi fyrir valinu á meðan aðra daga Amy Winehouse. 

Ég notast við alltof marga playlista, valkvíðinn er mikill.

Uppáhalds matur og af hverju?

Bleikjan á Messanum, ekki auglýsing, myndi óska þess. Himnesk, stökk, samt mjúk, sæt en sölt. Og ef ég ætti að nefna mat sem er aðgengilegri þá er það auðvitað harðfiskur með íslensku smjöri!

Besta ráð sem þú hefur fengið?

Að hafa gaman í partýinu áður en manni er hent út.

Hvað er það skemmtilegasta við lífið?

Að lifa. Nei nei ég segi svona. Jú auðvitað það, en fjölskyldan og vinirnir eru eiginlega bara það langskemmtilegasta við lífið. Og þær minningar sem maður skapar með þeim.


Tengdar fréttir

„Margt verra en smá brussugangur“

Eva Ruza er lífskúnstner með meiru en hún hefur haslað sér völl í skemmtanabransanum á Íslandi á undanförnum árum. Pizza er umhugsunarlaust uppáhalds maturinn hennar og hún segist geta fundið innblástur í hvaða verkefni sem er. Eva Ruza er viðmælandi vikunnar í Innblæstrinum.

„Reyni að þakka fyrir allt það sem ég fæ á hverjum degi“

Jón Jósep Snæbjörnsson, Jónsi, er landsþekktur tónlistarmaður og lífskúnstner með meiru. Hann er þekktur fyrir jákvæðni og lífsgleði og segir lífið sjálft vera það allra skemmtilegasta. Jónsi er viðmælandi vikunnar í Innblæstrinum.






Fleiri fréttir

Sjá meira


×