Innblásturinn er fastur liður hjá Lífinu á Vísi þar sem rætt er við ólíkt fólk um hvað veitir því innblástur í tilverunni og hvaða ráðum þau luma á varðandi andlega heilsu.
Hver ert þú í þínum eigin orðum?
Eiginkona, tveggja barna móðir og 180 cm brussa sem elskar galsa og gleði.
Held að ég muni aldrei þroskast upp úr brussuganginum en það er allt i lagi. Margt verra en smá brussugangur.
Hvað veitir þér innblástur?
Það er svo margt sem veitir mér innblástur. Húmor, skemmtilegt fólk og ástríðan sem ég hef fyrir því sem ég er að gera. Ég get fundið mér innblástur í hvaða verkefni sem er.
Hvað er þitt besta ráð til að næra andlega heilsu?
Að hugsa vel um sjálfa mig númer eitt tvö og þrjú. Og þá er ég ekkert endilega að meina í sambandi við hreyfingu eða hvað ég borða (sem skiptir líka höfuðmáli).
Það að vera með vinkonum mínum í hláturskasti er held ég besta andlega næring sem hægt er að fá.
Sú næring tekur andlegu heilsuna upp á annað level og gefur lífið extra mikla birtu.
Hvernig er hefðbundinn dagur í þínu lífi?
Í raun er enginn dagur eins hjá mér, sem ég elska. En ég vakna snemma alla morgna, fæ mér hollan morgunmat og hendi mér svo á æfingu þegar börnin eru komin af stað út í sinn dag. Svo eru verkefnin mín misjöfn þar sem ég starfa í skemmtibransanum.
Suma daga er ég þéttbókuð frá morgni til kvölds í allskonar verkefnum, en aðra daga er ég heimavinnandi húsmóðir- sem er ferlega góður balance.
Uppáhalds lag og af hverju?
Lagið Vente Pa Ca með Ricky Martin og Maluma er akkúrat um þessar mundir í miklu uppáhaldi. Ég hef alltaf verið sjóðandi heit fyrir honum Ricky mínum og það er eitthvað við þetta kombó, Ricky og Maluma, sem gefur mér gæsahúð.
Uppáhalds matur og af hverju?
Ég er mjög auðveld i þessum lið. Það jafnast ekkert á við ekta eldbakaða pizzu með extra osti, skinku og já, ananas. Ég ætla bara að segja það. Ananasinn er lífið í pizzulífinu. Ef ég ætti að velja mína hinstu máltíð þá væri það alltaf pizza.
Kannski var ég spænskur pizzubakari i fyrra lífi. Gæti vel verið.
Elska pizzur og spænska tónlist.
Besta ráð sem þú hefur fengið?
Aldrei hætta að elta drauminn, því hann mun rætast ef þú kastar honum út í kosmósið.
Hvað er það skemmtilegasta við lífið?
Lífið er svo geggjað fyrirbæri. Fólkið sem fylgir manni í lífinu er það sem gerir lífið skemmtilegt. Það væri asskoti einmanalegt ef maður ætti ekki einhverja sem leiða mann áfram þennan veg sem við göngum. Þegar brekkurnar koma þá er nauðsynlegt að hafa einhvern sem ýtir á bakið og hjálpar manni upp.
Það er svo ekkert betra í heiminum en að sjá börnin mín heilbrigð og hamingjusöm. Þau eru klárlega það besta og skemmtilegasta sem hefur komið inn í líf mitt.
