Hin 28 ára gamla Ragnheiður er uppalin á Ásvöllum í Hafnafirði og snýr nú aftur eftir erfiðan tíma hjá Val. Hún sleit krossband í hné síðla árs 2020 og var tæpt ár frá keppni. 

Hún sneri til baka síðasta haust og hjálpaði Val að landa bikarmeistaratitlinum. Valskonur töpuðu naumlega fyrir Fram í úrslitum Íslandsmótsins.

Haukar greindu frá vistaskiptum Ragnheiðar á samfélagsmiðlum sínum. Þar segir að það sé mikið „ánægjuefni að fá Ragnheiði heim á Ásvelli og verður gaman að sjá hana í Haukabúningnum á ný í haust.“ Þar kemur einnig fram að Ragnheiður gerir tveggja ára samning við félagið.

Ragnheiður, sem leikur iðulega á línunni, spilaði stórt hlutverk í Haukaliðinu sem varð deildarmeistari árið 2016. Haukar vonast til að endurtaka leikinn og gera enn betur á næstu leiktíð.