Innlent

Fjársvikamál Zuism-bróður tekið upp aftur

Kjartan Kjartansson skrifar
Einar Ágústsson hlaut þungan fangelsisdóm fyrir að svíkja tugir milljóna út úr fjórum einstaklingum árið 2018. Mál hans verður nú tekið upp aftur í Landsrétti.
Einar Ágústsson hlaut þungan fangelsisdóm fyrir að svíkja tugir milljóna út úr fjórum einstaklingum árið 2018. Mál hans verður nú tekið upp aftur í Landsrétti. Vísir/Vilhelm

Endurupptökudómur hefur fallist á beiðni Einars Ágústssonar, annars tveggja bræðra sem eru kenndir við trúfélagið Zuism, um endurupptöku á máli þar sem hann var sakfelldur fyrir stórfelld fjársvik. Réttaráhrif upphaflega dómsins haldast á meðan beðið er nýs dóms.

Landsréttur staðfesti sakfellingu Héraðsdóms Reykjanes yfir Einari í fjársvikamálinu í nóvember 2018. Einar var dæmdur þriggja ára og níu mánaða fangelsi og tl að greiða meira en sjötíu milljónir króna í bætur. Fjármunir úr þrotabúi Skajaquoda, félags Einars, voru teknir upp til að greiða skaðabótakröfur í málinu.

Einar var sakfelldur fyrir að svíkja um 74 milljónir króna út úr fjórum einstaklingum. Fjórmenningarnir höfðu fengið Einari fé í þeirri trú að hann ræki fjárfestingarsjóðinn Skajaquoda Fund í Bandaríkjunum. Slegið var föstu í dómnum að sjóðurinn hefði í raun aldrei verið starfræktur.

Einar var ekki talinn eiga sér neinar málsbætur. Brotavilji hans hafi verið einbeittur og brotin skipulögð og úthugsuð.

Einn dómaranna í Landsrétti sem kvað upp dóminn var á meðal þeirra sem Sigríður Á. Andersen, þáverandi dómsmálaráðherra, var talin hafa skipað ólöglega. Mannréttindadómstóll Evrópu komst að þeirri niðurstöðu að skipan dómara við Landsrétt árið 2017 hafi strítt gegn mannréttindasáttmála Evrópu. 

Endurupptökudómur hefur þegar fallist á endurupptöku á nokkrum málum með vísan til dóms Mannréttindadómstólsins.

Fórnarlömb fjársvikanna andmæltu endurupptöku

Í beiðni sinni um endurupptöku vísaði Einar til dóms Mannréttindadómstólsins og að hann hefði verið ranglega sakfelldur. Ríkissaksóknari taldi ekki ástæðu til þess að skila umsögn um beiðnina í ljósi þess að endurupptökudómur hefur áður fallist á endurupptöku í málum þar sem eins stóð á.

Hins vegar tjáðu ríkissaksóknari og lögmaður Einars sig sérstaklega um sjónarmið þeirra sem Einar var sakfelldur fyrir að svíkja fé út úr og gerðu einkaréttarkröfu í málinu. Kröfuhafarnir andmæltu endurupptöku málsins, sérstaklega að bótakröfur þeirra yrðu teknar upp aftur.

Ríkissaksóknari taldi ekki annað hægt en að málið yrði tekið upp aftur í heild sinni enda væri beint samhengi á milli sakar í refsiþætti málsins og bótakrafnanna. Lögmaður Einars tók í sama streng, nauðsynlegt væri að dæma á ný um einkaréttarlegar kröfur samhliða öðrum þáttum. 

Endurupptökudómur var á sama máli og úrskurðaði að málið skyldi allt tekið upp aftur. Hins vegar ákvað hann að réttaráhrif upphaflega Landsréttardómsins hvað varðaði einkaréttarkröfurnar héldust þar til nýr dómur yrði kveðinn upp.

Hluta dómsins sem laut að upptöku á fjármunum þrotabús Skajaquoda var ekki áfrýjað og því mun Landsréttur ekki fjalla um þann þátt þegar málið kemur aftur til kasta hans. Beiðni Einars fór fram á að nýr dómur yrði kveðinn upp um þennan þátt málsins jafnvel þó að honum hefði ekki verið áfrýjað til Landsréttar á sínum tíma.

Einar og Ágúst Arnar Ágústsson bróðir hans voru sýknaðir af ákæru um fjársvik og peningaþvætti í tengslum við starfsemi trúfélagsins Zuism í Héraðsdómi Reykjavíkur í apríl. Ríkissaksóknari áfrýjaði dómnum til Landsréttar.


Tengdar fréttir

Zúista­bróðir fer fram á endur­upp­töku á þungum fjár­svika­dómi

Einar Ágústsson, annar tveggja bræðra sem héldu úti trúfélaginu Zuism, hefur óskað eftir því að þungur fangelsisdómur sem hann hlaut fyrir tugmilljóna króna fjárdrátt verði tekinn upp aftur. Þeir bræður eru ákærðir fyrir peningaþvætti og fjársvik vegna Zuism.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.