Kaup­máttur jókst þrátt fyrir mikla verð­bólgu

Þetta kemur fram í nýjum tölum Hagstofunnar en vísitala neysluverðs jókst um 6,18% á sama tímabili. Áætlað er að ráðstöfunartekjur á mann hafi numið rúmlega 1,1 milljón króna á fyrsta ársfjórðungi þessa árs og hafi aukist um 7,49% frá sama tíma í fyrra.

Samkvæmt Hagstofunni jukust heildartekjur heimilanna um 12,6% milli fyrsta ársfjórðungs 2021 og 2022. Launatekjur jukust um 15,8% en áætlað er að eignatekjur hafi aukist um 6,7% og að vaxtatekjur aukist um 18,9% á tímabilinu.

Lífeyristekjur og félagslegar tilfærslur drógust saman um 2,4% á fyrsta ársfjórðungi þessa árs samanborið við fyrsta ársfjórðung seinasta árs.

Hagstofan áætlar jafnframt að heildargjöld heimilanna hafi aukist um 16,2% á fyrsta ársfjórðungi 2022 samanborið við sama ársfjórðung í fyrra. Skattgreiðslur jukust um 20,4% og er áætlað að tryggingagjöld hafi aukist um 17% á tímabilinu.

Eignagjöld jukust um 14,6% á fyrsta ársfjórðungi 2022 samanborið við sama tímabil í fyrra og vaxtagjöld þar af um 15% sem einkum skýrist af auknum útlánum lánastofnana til heimila vegna fasteignakaupa.