Hyggjast klára brúargólfið í Þorskafirði fyrir veturinn

Kristján Már Unnarsson skrifar 6. júní 2022 22:26

Einar Valur Valgarðsson, verkstjóri Suðurverks í Þorskafjarðarbrú. Arnar Halldórsson

Smíði Þorskafjarðarbrúar, sem styttir Vestfjarðaveg um níu kílómetra, er komin vel á veg og er stefnt að því að brúargólfið verði tilbúið í haust. Verktakinn hefur leigt Bjarkalund undir vinnubúðir og verður hótelið lokað ferðamönnum næstu tvö árin.

Fjallað var um verkefnið í fréttum Stöðvar 2 en það var í aprílmánuði í fyrra, fyrir rúmu ári, sem verktakinn Suðurverk hóf þverun Þorskafjarðar. Það er þó fyrst núna sem hin eiginlega brúarsmíði er komin á fulla ferð.

Frá brúargerðinni yfir ÞorskafjörðArnar Halldórsson

Þegar fyllingin undir brúarstæðið var orðin þétt mætti flokkur Vegagerðarinnar á svæðið til að reka niður staura og verktakinn Árni Helgason á Ólafsfirði sá um að girða stöplastæðin af með stálþili. Smíðaflokkur frá Eykt mætti svo í febrúar til að smíða brúarstöplana.

„Þrír stöplar komnir niður af sjö. Þannig að þetta potast,“ segir Einar Valur Valgarðsson, verkstjóri Suðurverks í þessu 2,2 milljarða króna verki.

Sjö stöplar verða undir brúnni. Þrír þeirra eru tilbúnir.Arnar Halldórsson

„Við stefnum að því að ljúka brúargólfinu í haust, fyrir næsta vetur. Þannig að þá erum við á grænni grein með framhaldið.“

Þá verður unnt að moka undan 260 metra langri brúnni, hleypa firðinum undir og síðan tengja brúna við landið vestanmegin.

„Þetta fer náttúrulega allt eftir veðrum. Og hér getur verið mjög illviðrasamt hér niður við sjóinn, norðanfræsingur og rok, þó að það sé allt annað veður hér ofar í landinu.“

Þegar brúargólfið verður tilbúið í haust verður grafið undan brúnni og byrjað að tengja hana við land vestanmegin.Arnar Halldórsson

Starfsmenn eru núna tæplega tuttugu talsins en fjölgar þegar brúarsmíðin nær hámarki.

„Þegar hefst vinna í brúargólfinu, þá fjölgum við smiðum og keyrum þetta áfram. Hér er ekkert stoppað. Hér er bara unnið alla daga.“

Og ekki væsir um mannskapinn því Suðurverk hefur leigt Hótel Bjarkalund undir vinnubúðir en á meðan er það ekki rekið sem hótel fyrir ferðamenn.

„Nei, það verður lokað alveg. Við verðum með það meðan á þessu verki stendur.“

Hótel Bjarkalundur í Reykhólasveit. Tignarleg Vaðalfjöll gnæfa yfir.Arnar Halldórsson

Einar segir verkið nokkurn veginn á áætlun.

„Það er í júnílok 2024 sem verktíminn á að vera búinn. Þannig að þá geta landsmenn og aðrir keyrt hér yfir. Og svo áframhaldið í Teigsskóginum, sem verið er að byrja á núna,“ segir Einar Valur hjá Suðurverki.

Hér má sjá frétt Stöðvar 2:

Vegagerð Samgöngur Reykhólahreppur Teigsskógur Umferðaröryggi

Tengdar fréttir

Þingmannssonur frá Akureyri sem hóf að ryðja Teigsskóg

Ungur akureyskur þingmannssonur á trjákurlara er í raun sá sem byrjaði á því að ryðja Teigsskóg. Hann er langt kominn með að hreinsa burt allt það skóglendi sem þarf að víkja vegna vegagerðarinnar.

31. maí 2022 22:30

Gröfustjórinn segir að passa verði hverja þúfu í Teigsskógi

Ein umdeildasta vegagerð landsins, lagning vegar um Teigsskóg, hófst í dag, nítján árum eftir að tillaga um þessa veglínu var fyrst kynnt. Þessi ellefu kílómetra vegarkafli á að verða tilbúinn í október á næsta ári.

30. maí 2022 23:23

Vill ekki vera kölluð Gugga þótt hún stýri Bjarkalundi

Hótel Bjarkalundur í Reykhólasveit, sem frægt varð fyrir sjónvarpsþættina um Georg Bjarnfreðarson og félaga, hefur verið tekið undir vinnubúðir. Þar má samt enn sjá leikmuni úr Dagvaktinni, þar á meðal morðvopnið sem notað var til að drepa hótelstýruna Guggu.

5. október 2021 21:21

Ernir fljúga yfir vinnusvæði þrátt fyrir sprengingar og véladrunur

Miklar sprengingar og drynjandi hávaði vinnuvéla í brúargerð í Þorskafirði hafa ekki fælt haferni frá vinnusvæðinu. Þeir fljúga yfir á hverjum degi til að forvitnast um framvindu verksins, að sögn verkstjóra Suðurverks.

30. september 2021 22:44

Verktakinn byrjar þverun Þorskafjarðar í næstu viku

Verksamningur milli Vegagerðarinnar og Suðurverks um þverun Þorskafjarðar var undirritaður í dag. Vegamálastjóri segir þetta lið í gríðarlegum samgöngubótum á Vestfjörðum sem stytti leiðina milli Reykjavíkur og Ísafjarðar um fimmtíu kílómetra.

8. apríl 2021 19:52

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.