Fjórflokkarnir í Reykjavík byrjaðir á ritun meirihlutasáttmála

Það eru fjórir dagar í fyrsta borgarstjórnarfundinn á nýju kjörtímabili. Það er ekkert sem segir að borgarstjórn geti ekki komið saman þótt ekki sé búið að mynda meirihluta. En oddvitar flokkanna fjögurra sem nú ræða saman stefna ljóst og leynt að því að ljúka meirihlutaviðræðunum fyrir borgarstjórnarfundinn.

Nýir og áður kjörnir borgarfulltrúar luku þriggja daga námskeiði í Ráðhúsinu í dag þar sem farið var yfir stjórnkerfi borgarinnar, nefndir, ráð og fundarsköp sem aðeinhverju leyti hefur tafið meirihlutaviðræður oddvita flokkanna fjögurra.

Þórdís Lóa Þórhallsdóttir oddviti Viðreisnar í Reykjavík segir þau hins vega stefna á stíf fundarhöld um helgina.

„Við ætlum að nota helgina já. Höfum aðeins verið að nota þessa daga. Tekið örfundi og það hefur bara gengið vel. Aðeins að halda okkur heitum. Það skiptir líka máli,“ segir Þórdís Lóa.

Þau hafi náð að snerta á öllum málaflokkum.

„Nú erum við byrjuð í textavinnu og byrjuð að aðgerðabinda og hnoða þetta meira saman. Svo er náttúrlega það sem allir eru alltaf að spyrja um; hlutverkin sem við förum í síðast,“ segir Þórdís Lóa sposk á svip. Það komi að því um helgina eða þegar líða taki á annan í Hvítasunnu á mánudag.

Enginn einn málaflokkur hafi reynst flokkunum erfiður þótt þeir hefðu stundum ólíka sýn innan einstakra málaflokka.

„En það steytir ekki á neinu stórkostlegu. Það er kannski eitt af því sem við vorum búin að átta okkur á í kosningabaráttunni. Að leiðir þessara fjögurra flokka eru bara nokkuð góðar þegar kemur aðheildarsýn á hvernig borg við viljum til frambúðar.“

Er eitthvað þar sem mun koma okkur almenningi á óvart?

„Ég held að við getum alla vega verið alveg viss um að það verða breytingar. Við erum að setja kraft í ýmis mál.“

Kannski með pólitískt lygaramerki á tánum, tekst þetta fyrir þriðjudag?

„Ég vona það og við stefnum að því,“ segir Þórdís Lóa Þórhallsdóttir.