Erlent

Heil beinagrind risaeðlu seld á uppboði

Bjarki Sigurðsson skrifar
Höfuðkúpa úr klóeðlu.
Höfuðkúpa úr klóeðlu. Zrfphoto/Getty

Beinagrind klóeðlu var seld á uppboði í Christie‘s uppboðshúsinu í vikunni. Beinagrindin seldist á 12 milljónir dollara, rúmlega 1,6 milljarði íslenskra króna.

Beinagrindin samanstendur af 126 beinum og fundust þau í Montana-fylki í Bandaríkjunum árið 2013. Talið er að beinin séu 108 til 115 milljón ára gömul.

Talið var að beinagrindin myndi seljast á um sex milljónir dollara og kom það mörgum á óvart að einhver hafi boðið tvöfalt hærri upphæð. Ekki er vitað hver keypti beinagrindina en hún var í einkaeigu ótilgreinds aðila fyrir uppboðið samkvæmt CNN.

Talið er að klóeðla hafi litið svona út þegar hún gekk á Jörðinni.Getty

Beinagrindin hefur verið skírð „Hector“ og er ein af þremur heilum klóeðlubeinagrindum sem til eru í heiminum. Hinar tvær beinagrindurnar eru til sýnis á söfnum.

Þrátt fyrir að nafnið klóeðla sé ekki þekkt þá ættu flestir að kannast við risaeðluna úr Jurrasic Park-myndunum. Útlit snareðlanna sem birtust í kvikmyndunum voru að miklu leiti byggðar á klóeðlunni.

Á latnesku er heiti eðlunnar Deinonychus antirrhopus og merkir fyrri hluti nafnsins „hræðileg kló“ en eðlan var með stóra kló á sitthvorum fæti sem hún notaði til að opna líkama fórnarlamba sinna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×