DV greindi frá því í gær að hinn grunaði heitir Brynjar Joensen Creed og hefur fréttastofa fengið það staðfest. Brynjar sætir ákæru fyrir brot gegn fimm stúlkum á grunnskólaaldri. Meint brot hans gegn stúlkunum sem ákært er fyrir eru sautján.
Aðalmeðferð fór fram í Héraðsdómi Reykjaness á dögunum en þinghald í málinu, líkt og flestum kynferðisbrotamálum, er lokað.
Hálft ár í gæsluvarðhaldi
Ríkisútvarpið greindi frá því í hádeginu í dag að lögregla sé með fjölmörg brot til viðbótar til rannsóknar. Kolbrún Benediktsdóttir varahéraðssaksóknari staðfestir það í samtali við fréttastofu.
Brynjar hefur setið í gæsluvarðhaldi á Hólmsheiði síðan í nóvember eða í um hálft ár. Kolbrún útskýrir í samtali við fréttastofu að héraðssaksóknari geti aðeins haldið sakborningi í gæsluvarðhaldi í tólf vikur án ákæru. Því hafi aðeins verið gefin út ákæra fyrir hluta þeirra brota sem séu til rannsóknar.
Vísir fjallaði ítarlega um efni ákærunnar í vikunni.
Fjölmiðlar komust ekki á snoðir um málið, sem er afar umfangsmikið, fyrr en á þriðjudag þegar Vísir greindi frá efni ákærunnar. Samkvæmt heimildum fréttastofu kærði lögmaður Brynjars engan gæsluvarðhaldsúrskurð yfir manninum til Landsréttar.
Landsréttur birtir jafnan niðurstöður í slíkum kærumálum á vef sínum nema rannsóknarhagsmunir komi í veg fyrir slíka birtingu.
Nauðgun án þess að vera á staðnum
Brynjar er ákærður fyrir nauðgun, kynferðisbrot og kynferðislega áreitni - allt gagnvart börnum. Athygli vekur að karlmaðurinn er ákærður fyrir nauðgun með því að hafa í krafti yfirburðastöðu sinnar vegna aldurs- og þroskamunar auk loforða um gjafir fengið stúlkurnar til að stunda kynferðislegar athafnir, taka upp á myndband og senda sér.
Samkvæmt upplýsingum fréttastofu hefur ekki áður reynt á slíka túlkun á 1. málsgrein 194. greinar almennra hegningarlaga sem fjallar um nauðgun.
194. grein almennra hegningarlaga
Hver sem hefur samræði eða önnur kynferðismök við mann án samþykkis hans gerist sekur um nauðgun og skal sæta fangelsi ekki skemur en 1 ár og allt að 16 árum. Samþykki telst liggja fyrir ef það er tjáð af frjálsum vilja. Samþykki telst ekki liggja fyrir ef beitt er ofbeldi, hótunum eða annars konar ólögmætri nauðung. Til ofbeldis telst svipting sjálfræðis með innilokun, lyfjum eða öðrum sambærilegum hætti.
Það telst einnig nauðgun og varðar sömu refsingu og mælt er fyrir um í 1. mgr. að beita blekkingum eða notfæra sér villu viðkomandi um aðstæður eða að notfæra sér geðsjúkdóm eða aðra andlega fötlun manns til þess að hafa við hann samræði eða önnur kynferðismök, eða þannig er ástatt um hann að öðru leyti að hann getur ekki spornað við verknaðinum eða skilið þýðingu hans.
Samkvæmt heimildum fréttastofu eru stúlkurnar sem karlmaðurinn er ákærður fyrir að hafa brotið á búsettar á Suðurnesjum og á höfuðborgarsvæðinu. Lögreglan á Suðurnesjum er með málið til rannsóknar.
Í Kompás árið 2020 var fjallað um kynferðisbrot gegn börnum á netinu.
Aukið álag í Barnahúsi vegna brota gegn börnum
Ólöf Ásta Farestveit, forstjóri Barna- og fjölskyldustofu sem Barnahús heyrir undir, segir álagið í Barnahúsi hafa aukist mjög árið 2021. Skýrslur af börnum í kynferðisbrotamálum eru teknar í Barnahúsi.
Ólöf segir að þau hafi fundið fyrir verulega auknu álagi árið 2021 vegna Covid-19 faraldurins og fjölda mála þar sem grunur leikkur á um brot gegn börnum.
„Það eru svo mörg börn á bak við hvern geranda,“ segir Ólöf. Barnahús hafi fengið Covid-styrk frá ráðuneytinu og getum ráðið í eitt og hálft stöðugildi sérfræðinga hjá Barnahúsi. Fyrir voru sex sérfræðingar svo um 25% aukningu er að ræða.
