Útsending frá blaðamannafundi að loknum undanúrslitunum hefst klukkan 21:30 en þar munu íslensku fulltrúarnir sitja fyrir svörum ásamt öðrum flytjendum sem komust áfram. 

Auk Íslands komust Sviss, Armenía, Litháen, Portúgal, Noregur, Grikkland, Úkraína, Moldavía og Holland áfram í lokakeppnina. Alls börðust sautján lönd um pláss í úrslitunum í kvöld en tíu fá að snúa aftur á stóra sviðið í PalaOlimpico-höllinni í Tórínó.

Mikil spenna ríkti á meðan tilkynnt var hvaða atriði voru hlutskörpust en Ísland var þriðja ríkið til að verða lesið upp í útsendingunni. Flutningur systkinanna gekk vonum framar og hafa fjölmargir hrósað frammistöðunni á samfélagsmiðlum.