Menning

Ólíkir dansarar frá tólf ára upp í áttrætt sameinast í einu dansverki

Dóra Júlía Agnarsdóttir skrifar
Einar Snorri fyrsti breik-dansari landsins. Fólk á öllum aldri sameinast í dansverkinu Ball.
Einar Snorri fyrsti breik-dansari landsins. Fólk á öllum aldri sameinast í dansverkinu Ball. Hörður Sveinsson

Danshöfundarnir Alexander Roberts og Ásrún Magnúsdóttir frumsýna sýninguna Ball næstkomandi föstudag, 6. maí, fyrir Íslenska dansflokkinn og níu gesta dansara. Sýningin fer fram á Nýja sviði í Borgarleikhúsinu. Þar sameinast dansarar á öllum aldri með gjörólíkan bakgrunn og er dansgleðin í forgrunni. Blaðamaður hafði samband við Alexander og Ásrúnu og fékk að heyra nánar frá sýningunni.

Danshöfundarnir Ásrún Magnúsdóttir og Alexander Roberts.Aðsend

Sameiginleg ást á dansi

Á balli koma saman atvinnudansarar og áhugadansarar - Íslandsmeistari í breikdansi frá níunda áratugnum, ballerína á eftirlaunum, samkvæmisdans stjarna, freestyle goðsögn, bollýwood dansari, streetdansari, dansarar Íslenska dansflokksins, gó-gó dansari, dansnemandi og nútímadansari sem elskar að dansa við Bob Marley. Það sem þau eiga öll sameiginlegt er ást þeirra á dansi.

Ball býður dans elskendum á öllum aldri, með ólíka líkama, mismunandi bakgrunn og reynslu að stíga upp á svið og dansa saman. Hvert og eitt þeirra býður upp á dans, velur sína tónlist og finnur leið til þess að deila sínum dansi með hópnum. Dansinn á ekki bara að snúast um afburðartækni eða ómælda hæfileika hvers og eins heldur einnig um upplifunina á því að dansa alla þessa dansa saman. Rétt eins og gerist á balli.

Ball snýst meðal annars um upplifun fólks á að dansa saman.Hörður Sveinsson

Hvaðan sækið þið innblástur fyrir sýningunni ball?

Við sækjum innblástur í dansarana sem við erum að vinna með. Það eru dansararnir sem koma fram á Ballinu sem þessi sýning er. 

Það eru allskonar dansarar með ólíka bakgrunna og öll koma með sinn dans á Ball. Þau og þeirra hæfileikar í dansi búa til sýninguna.

Eftir tímana sem við höfum gengið í gegnum undanfarið er einnig auðvelt að fá innblástur frá tilfinningunni sem fylgir því að sjá fólk koma saman, hanga saman, dansa saman og finna tengingar. Hugmyndin um að koma saman var auðvitað mjög sjálfsögð áður fyrr en eftir Covid hefur þetta fengið nýja og þýðingarmeiri merkingu.

Er algengt að dansarar með ólíka sérhæfingu sameinist í verki?

Það er örugglega ekki algengt að ólíkir dansarar sameinist í einu verki. Í þessu verki sjáum við ballettdansara, break-dansara, bollýwood dansara, street-dansara, K-pop dansara, freestyle goðsögn, samkvæmisdansara og gógó-dansara öll dansa saman. Aldursbilið er líka breitt en yngsti dansarinn er tólf ára og sú elsta er í kringum áttrætt.

Dansgleðin er smitandi.Hörður Sveinsson

Hefur verkið verið lengi í vinnslu?

Já verkið hefur verið frekar lengi í vinnslu. Covid er búið að stoppa það nokkrum sinnum, æfingar og fresta frumsýningu um ár, svo núna er komið að því og við vonum að það sé tilbúið.

Hvernig hefur ferlið gengið?

Ferlið hefur bara verið æðislegt. Það var náttúrulega erfitt fyrst þegar Covid var alltaf að setja á okkur hindranir en á sama tíma var það bara gott af því þá náðum við að melta verkið og hugmyndina betur og það bara gaf okkur lengri tíma til þess að prófa hluti. Núna síðustu vikur hafa verið frábærar. 

Hópurinn vinnur vel saman.Hörður Sveinsson
Hópurinn smellur saman og það er æðislegt að sjá svona ólíka dansara dansa saman. Þau hlusta vel á hvort annað og gefa hvort öðru rými til þess að láta ljós sitt skína.

Annað sem þið viljið taka fram?

Við bara mælum með að fólk skelli sér á Ball. Við lofum stuði og stemningu!

Dansverkið Ball verður frumsýnt næstkomandi föstudag.Hörður Sveinsson

Tengdar fréttir

Virkjar ungdóminn til að efla menningarlífið í landinu

Ásrún Magnúsdóttir dansari og danshöfundur er að stofna nýjan skóla fyrir ungt fólk á aldrinum þrettán til átján ára. Skólinn er fyrir unglinga sem langar til þess að verða listamenn, sýningarstjórar, aktívistar eða hvað sem er sem er tengt menningu og listum.






Fleiri fréttir

Sjá meira


×