Oddvitaáskorunin: Fengu gistingu í anddyrinu á lögreglustöðinni við Hlemm

Ómar Már Jónsson leiðir lista Miðflokksins í Reykjavík í komandi sveitarstjórnarkosningum.

Ég er Vestfirðingur, uppalinn í Súðavík. Fyrsta starfið mitt var að bera út póst í þorpinu þá 11 ára, fór á sjóinn 15 ára. Tók II stigs skipstjórnarréttindi frá Stýrimannaskólanum í Reykjavík og þá aftur á sjóinn sem stýrimaður á togurum.

Útskrifaðist sem Iðnrekstrarfræðingur af markaðssviði frá Tækniskóla Ísland s og stofnaði fyrirtæki í Reykjavík sem ég rak þar til ég var ráðinn sveitarstjóri Súðavíkurhrepps þar sem ég var í 12 ár.

Sjá einnig: Oddvitar um allt land sýna hina hliðina í Oddvitaáskorun Vísis

Eftir að því starfi lauk fluttum við aftur til Reykjavíkur og hef ég starfað í eigin fyrirtækjum, m.a. sem ráðgjafi við að para saman erlend fyrirtæki við íslensk, starfað í viðburðahaldi, s.s. að halda eigin ráðstefnur, vörusýningar og flutt inn hljómsveitir.

Ég hef sérstakt dálæti á krefjandi verkefnum sem reyna á en bæta lífið og tilveruna með einum eða öðrum hætti.

Hver er fallegasti staðurinn á Íslandi?

Þórsmörk. Ómótstæðileg íslensk náttúrfegurð.

Er eitthvað lítilvægt sem fer þó í taugarnar á þér í þínu sveitarfélagi sem þú vilt að sé lagað?

Að þjónustubeiðnir eru sendar inn til borgarinnar um eitthvað sem betur má fara skili sér alla leið og brugðist sé við því. T.d. sendi konan beiðni til borgarinnar um að laga rólu á opnu svæði í Seljahverfi sem tók tvö ár að laga.

Hvert er þitt uppáhalds áhugamál sem gæti þótt skrítið?

Sjósund með systrum mínum. Byrjaði í janúar sl. þegar sjóhitinn var fyrir neðan 0, og félagarnir héldu að ég væri að tapa mér.

Hver eru þín minnistæðustu samskipti við lögregluna?

Þegar við 15 ára gamlir skólarfélagar á Reykjum Hrútafirði fengum gistingu í anddyrinu á Lögreglustöðunni við Hlemm þar sem við höfðum ekki haft rænu á að redda okkur gistingu. Voru strangar samningaviðræður sem þurfti til að þeir leyfðu okkur það.

Hvað færðu þér á pizzu?

Pepparoni, ost og mikið af Chilli. Ananas er líka allt í lagi.

Hvaða lag peppar þig mest?

Mugison - Murr Murr.

Hvað getur þú tekið margar armbeygjur?

50 armbeygjur. Hef ekki reynt við fleiri.

Göngutúr eða skokk?

Göngutúr.

Uppáhalds brandari?

Lögreglan: „Af hverju stalstu fólksbílnum?“ Guðmundur: „Ég þurfti að komast í vinnuna.“ Lögreglan: „Af hverju tókstu ekki strætó?“ Guðmundur: „Ég er ekki með meirapróf.“

Hvað er þitt draumafríi?

Til einhverjar af grísku eyjunum.

Hvort fannst þér 2020 eða 2021 vera verra ár?

Mér fannst hvorugt verra þrátt fyrir allskonar takmarkanir.

Uppáhalds tónlistarmaður?

Cris Rea.

Hvað er það skrýtnasta sem þú manst eftir að hafa gert?

Að hafa farið á hestbak á mjög hávöxnum hesti í Ástralíu, sem henti mér af baki og ég komst ekki á bak aftur og ég varð að teyma hann til baka.

Ef það væri gerð kvikmynd um ævi þína, hver ætti að leika þig? Má vera íslenskur eða  útlenskur.

Bradley Cooper.

Hefur þú verið í verbúð?

Bara í heimsókn og ansi oft.

Áhrifamesta kvikmyndin?

Gladiator.

Áttu eftir að sakna Nágranna?

Já, dóttir mín og þrjú barnabörn búa í Melbourne Ástralíu og ég hef horft á þættina með yngstu dóttur minni sem hafa verið svona hluti af okkar gæðastundum. Jafnframt finnst mér ákveðin tenging í því við fjölskylduna mína í Ástralíu að horfa á Nágranna.

Ef þú yrðir að flytja úr þínu sveitarfélagi, hvert myndir þú helst vilja fara?

Í Kópavog

Uppáhalds „guilty pleasure“ lag? (skammast þín smá fyrir að hafa gaman af því – sakbitin sæla)

I want to break free með Queen.