Stærsti hluthafi Völku, með fimmtungshlut, var Samherji en þar á eftir kom félag í eigu fjárfestanna Árna Haukssonar og Hallbjörns Karlssonar með rúmlega 15 prósenta hlut.
Í nýjasta ársreikningi Marels er upplýst um að kaupverðið hafi samanstaðið annars vegar af greiðslu reiðufjár upp 3,2 milljarða króna og hins vegar 2,6 milljónum hlutum að nafnvirði í Marel en markaðsvirði þeirra þegar kaupin gengu í gegn þann 19. nóvember síðastliðinn – hlutabréfaverð Marels var þá 842 krónur á hlut – var um 2,2 milljarðar. Frá þeim tíma hefur gengi bréfa Marels lækkað um 13 prósent og stendur nú í 732 krónum á hlut.
Samanlagt greiddi Marel því um 5,4 milljarða króna fyrir kaupin á Völku en tekið er fram að endanlegt kaupverð geti tekið breytingum í allt að 18 mánuði frá þeim degi þegar þau kláruðust. Vegna þessa er 200 milljónum króna í reiðufé haldið til hliðar tímabundið og eins 800 þúsund hlutum að nafnvirði í Marel sem eru í dag með markaðsvirði upp á tæplega 600 milljónir króna.
Þeir seljendur sem fengu greitt að helmingshluta með bréfum í Marel, sem voru allir aðrir en minni hluthafar Völku, skuldbundu sig til að eiga þau í að lágmarki 18 mánuði eftir kaupin.
Ekki var greint frá kaupverðinu þegar tilkynnt var um sameiningu félaganna í fyrra.
Valka og Marel hafa sagt að þau deili sömu sýn og markmiði að umbylta fiskvinnslu með því að hanna og þróa sjálfbærar hátækni fiskvinnslulausnir í nánu samstarfi við viðskiptavini. Í tilkynningu vegna kaupanna á sínum tíma var bent á að þau myndu styrkja vöruframboð Marel á heildarlausnum og auka stærðarhagkvæmni til þess að þjónusta viðskiptavini betur. Miðlun þekkingar og reynslu hjá sameiginlegu teymi mun hraða nýsköpun til að þjónusta betur þær öru breytingar sem eiga sér stað í sjávarútvegi og markaðsumhverfi. Fyrirtækin sjá mikla möguleika fyrir vörur og tækni Völku í öðrum prótíniðnuðum.
Helgi Hjálmarsson, sem tók við stöðu forstöðumanns vinnslulausna eftir kaupin, stofnaði Völku árið 2003 og hefur síðan þá kynnt til sögunnar fjölmargar nýstárlegar fiskvinnslulausnir sem hefur verið vel tekið af markaðsaðilum. Vöruframboð Völku inniheldur meðal annars vatnsskurðarvélar, snyrti- og flokkunarlínur. Valka var með um 17 milljónir evra í tekjur á árinu 2020, jafnvirði rúmlega 2,6 milljarða króna, en hjá félaginu starfa samtals 105 starfsmenn á Íslandi og í Noregi.
Þegar Marel birti ársuppgjör sitt í byrjun síðasta mánaðar var haft eftir Árna Oddi Þórðarsyni, forstjóra fyrirtækisins, að „hagfelldar markaðsaðstæður, sterk staða og fjárhagsstyrkur fyrirtækisins geri Marel nú „kleift að ráðast í stærri yfirtökur til að knýja fram áframhaldandi vöxt og viðgang.“
Í viðtali við Innherja á þeim tíma sagði Árni Oddur að áform um stórar yfirtökur væru gerðar í því skyni að ná metnaðarfullum markmiðum um tekjuvöxt sem þarf að vera töluvert meiri á næstu fimm árum en hann hefur að meðaltali verið á síðustu fimm.
Fjárfesting í sölu- og þjónustuneti í miðjum heimsfaraldri hafi skilað sér í því að tæknifyrirtækið sé í góðri stöðu miðað við keppinauta og býst við að „dulinn kostnaður“ vegna tafa og verðhækkana í aðfangakeðju, sem nemur um tveimur prósentum af tekjum Marel, muni ganga til baka á seinni hluta ársins.
Marel hefur sagt að fyrirtækið standi við markmið sín um 12 prósenta árlegan meðalvöxt á árunum 2017-2026 en vöxturinn frá 2017-2021 nam 7 prósent að meðaltali. Vöxturinn frá 2022-2026, bæði innri og ytri vöxtur, þarf því að nema um 16 prósentum á ári til þess að félagið nái markmiðum sínum.
Marel, sem er skráð á markað bæði á Íslandi og í Hollandi, er langstærsta fyrirtækið í Kauphöllinni með markaðsvirði upp á 565 milljarða króna. Hlutabréfaverð félagsins hefur hins vegar lækkað nokkuð skarpt á síðustu mánuðum, eða um fjórðung frá því í lok ágúst í fyrra þegar það var hvað hæst. Frá áramótum hefur gengið bréfa Marels fallið um rúmlega 16 prósent á meðan Úrvalsvísitalan hefur á sama tíma lækkað um tæplega tíu prósent.
