Tuttugu ríki hafa heitið Úkraínumönnum vopnum

Um er að ræða nánast allar tegundir vopna, allt frá skammbyssum og skotvopnum upp í eldflaugar og skriðdrekabana.

Meðal ríkjanna eru Þýskaland, Pólland, Holland og löngum hlutlaus ríki á borð við Svíþjóð og Finnland. Á sama tíma hefur Atlanshafsbandalagið greint frá því að til standi að flytja hergögn og aukinn herafla, allt að 22 þúsund hermenn, í nágrannaríki Rússlands og Hvíta Rússlands.

Ursula von der Leyen, forseti framkvæmdastjórnar Evrópusambandins, sagði á þriðjudag að öryggis- og varnarmál Evrópu hefðu þróast meira á síðustu sex dögum en síðustu tveimur áratugum.

Skýrendur benda hins vegar á að enn eigi eftir að koma í ljós hvort umræddar vopnagjafir muni skipta sköpum í átökunum við innrásarher Rússa og þá sé sá möguleiki fyrir hendi að þær muni enn auka á spennuna í samskiptum vestursins og Rússlands.