Innlent

2.393 greindust smitaðir innanlands í gær

Hallgerður Kolbrún E. Jónsdóttir skrifar
Tæplega 2.400 greindust smitaðir af kórónuveirunni innanlands í gær.
Tæplega 2.400 greindust smitaðir af kórónuveirunni innanlands í gær. Vísir/Vilhelm

2.393 greindust smitaðir af kórónuveirunni innanlands í gær. Það eru töluvert færri en í fyrradag en þá greindust 2.692 smitaðir af veirunni. 

Rúmlega 4.300 sýni voru tekin til greiningar innanlands í gær og var því hlutfall jákvæðra sýna því ríflega 50 prósent. 542 sýni voru tekin á landamærunum og greindust þar 102 smitaðir.

Alls eru nú 12.806  í einangrun með virkt smit, og fjölgar þeim um rúmlega þúsund milli daga. Nýgengi smita innanlands er nú 8.169 og á landamærunum er nýgengið nú 274.

Inniliggjandi á spítala eru nú 48 manns, þar af 39 á Landspítala. Tveir eru á gjörgæslu og hvorugur í öndunarvél.

Alls hafa nú 109.494 greinst smitaðir af veirunni frá því að fyrsta tilfellið greindist þann 28. febrúar 2020. 

Minna álag er nú á sýnatökum hjá Heilsugæslu höfuðborgarsvæðisins, eftir að sóttkví var felld niður, en veirufræðideild Landspítala er enn undir miklu álagi og er því nokkur bið eftir niðurstöðum.

Til stendur að aflétta öllum takmörkunum á föstudag en sóttvarnalæknir hefur sagt að þjóðin sé á hraðri leið í hjarðónæmi. Útbreiðslan sé líklega meiri en staðfestar tölur segja til um og ekki óvarlegt að áætla að helmingur þjóðarinnar eða meira hafi smitast.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×