Leiðtogar Bandaríkjanna, Bretlands og Rússlands eygja enn von á lausn

Gunnar Reynir Valþórsson skrifar 15. febrúar 2022 07:06

Rússneski kafbáturinn Rostov-on-Don siglir í átt að Bosporussundi til að taka þátt í umfangsmiklum heræfingum sem staðið hafa yfir vegna spennunar á svæðinu. epa/Erdem Sahin

Leiðtogar Bandaríkjanna, Bretlands og Rússlands segjast nú vongóðir um að hægt verði að leysa Úkraínudeiluna svokölluðu á diplómatískum grundvelli.

Þeir Joe Biden Bandaríkjaforseti og Boris Johnson forsætisráðherra Breta ræddu saman í síma í gærkvöldi um ástandið í Úkraínu en þeir hafa báðir síðustu vikur varað ítrekað við mögulegri innrás Rússa í landið.

Rússar neita þó fyrir allar slíkar fyrirætlanir þrátt fyrir að þeir hafi safnað meira en 100 þúsund hermönnum að landamærunum.

Sergei Lavrov utanríkisráðherra Rússa sagði í gær að enn væri hægt að leysa málið við samningaborðið og Biden og Johnson voru á sama máli eftir símafundinn.

Sérfræðingar segja þó að stóra deilumálið sé enn illleysanlegt.

Úkraínumenn sækjast eftir inngöngu í NATÓ, sem er stór þyrnir í augum Rússa sem krefjast þess að vesturveldin lýsi því yfir að slíkt komi ekki til greina. Vesturveldin hafa hinsvegar þegar hafnað þeirri kröfu og því virðist sem allt sé enn í hnút í málinu þrátt fyrir bjartsýnistón ráðamanna.

Úkraína Rússland Bandaríkin Bretland Hernaður Átök í Úkraínu

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.