Ákveðið hefur verið að hætta aðgerðum við Þingvallavatn í dag þar sem stefnt var að því að ná flugvélinni TF-ABB af botni vatnsins. Ís er nú upp í fjögurra sentimetra þykkur og það sem brotið er leggur jafnharðan.
Þetta kemur fram í tilkynningu frá lögreglunni á Suðurlandi. Búðirnar á bakka vatnsins verða teknar saman í dag og fluttar í burtu. Í framhaldi af þessu verði gerðar áætlanir um björgun vélarinnar og ráðist í þær þegar vatnið er opið og veður leyfir.
Óvíst sé um hvenær það geti orðið.
Greint var frá því í morgun aðstandendur hafi borið kennsl á alla fjóra sem voru um borð í vélinni en þeir náðust á land í gær.
Mikill viðbúnaður hefur verið við Ölfusvatnsvík síðustu daga vegna flugslyssins sem varð 3. febrúar síðastliðinn.
Þingvallavatn hefur lagt á ný og þykktin á ísnum gæti reynst slík að fresta þurfi því að ná flugvélinni TF ABB af botni vatnsins. Þeir fjórir sem voru í vélinni náðust á land í gær og hafa aðstanendur borið kennsl á þá látnu.
Aðstæður til köfunar í Þingvallavatni þóttu of erfiðar köfurum í dag vegna mikils kulda og ísmyndunar á Þingvallavatni. Því var smákafbátur með myndavélabúnaði og griparm notaður til að sækja lík þeirra sem létust í flugslysinu í síðustu viku.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
