Kardashian opnar sig um skilnaðinn: „Ég valdi sjálfa mig“

Kardashian prýðir forsíðu mars tölublaðs tímaritsins en í viðtalinu opnar hún sig um persónulega vegferð sína sem varð valdur af skilnaði hennar við barnsföður sinn, tónlistarmanninn Kanye West.

„Ég valdi sjálfa mig,“ segir Kardashian sem segist fram af því eytt alltof löngum tíma í að þóknast öðrum.

Kardashian og West skildu á síðasta ári eftir sex ára hjónaband. Óhætt er að segja að West hafi haft mikil áhrif á fatastíl Kardashian. Hún hefur til dæmis sagt frá því að hann hafi hreinsað allt út úr fataskáp hennar eftir að þau fóru að vera saman og keypt handa henni glæný föt.

„Ég hafði alltaf Kanye“

Í dag er Kardashian einn fremsti tískumógull heims, en hún var valin Fashion Icon ársins 2021 á People's Choice verðlaununum.

„Ég hugsa alltaf hvað verður næst? Ég hafði alltaf Kanye, sem vissi nákvæmlega hvert mitt næsta tískutímabil væri. Það er eitthvað ógnvekjandi við það að vera bara á eigin fótum, en líka eitthvað mjög frelsandi.“

Saman eiga Kardashian og West fjögur börn og hafa þau verið í sameiginlegri umsjá þeirra eftir skilnaðinn. West hefur ekki farið leynt með það að skilnaðurinn hefur reynst honum erfiður og hafa uppátæki hans verið eftir því. Kardashian hefur tekist að halda ró sinni í garð West, þar til nýlega þegar hún ákvað að svara honum opinberlega á Instagram.

Sjá: Mælirinn fullur hjá Kar­dashian sem á­kvað að svara fyrir sig

„Þú getur verið svo sár og reiður út í þinn fyrrverandi, en fyrir framan börnin þín ættirðu alltaf að sýna þeim það viðhorf að pabbi þeirra sé bestur. Þú þarft að vera hans stærsta klappstýra, sama hvað þú ert að ganga í gegnum persónulega.“

Hér má sjá nokkrar af myndunum úr viðtalinu.

Heimsbyggðin þekkir hana á líkamsvextinum einum

Það vakti heimsathygli þegar Kardashian mætti á MET Gala viðburðinn á síðasta ári með svarta grímu. Það var Balenciaga-hönnuðurinn Demna Gvasalia sem stóð á bak við klæðnað hennar.

„Upphaflega streittist ég á móti þessu. Ég var ekki viss hvort ég gæti verið með grímu. Af hverju ætti ég að vilja fela andlitið mitt?“ segir Kardashian um grímuna.

Þrátt fyrir að gríman hafi vissulega verið viðeigandi fylgihlutur í miðjum heimsfaraldri, þá var það ekki hugsunin. Hugsunin var sú að heimsbyggðin þyrfti ekki einu sinni að sjá andlit Kardashian til þess að þekkja hana, slík væri frægð hennar. Hana mætti þekkja á líkamsvextinum einum.

Kardashian verður 42 ára gömul á árinu en hún segist vakna klukkan hálf sex alla morgna og stunda líkamsrækt.

„Hjá mér mun fimmtugsaldurinn snúast um að standa með sjálfri mér. Ég ætla að borða hollt, stunda líkamsrækt, skemmta mér meira og eyða meiri tíma með börnunum mínum og fólkinu sem gerir mig hamingjusama.“