Bíó og sjónvarp

Ára­móta­skaupið telst í ó­fyndnara lagi

Jakob Bjarnar skrifar
Ef marka má könnun Maskínu var það ekki svo að landsmenn hafi kútvelst um stofur sínar af hlátri yfir síðasta Áramótaskaupi.
Ef marka má könnun Maskínu var það ekki svo að landsmenn hafi kútvelst um stofur sínar af hlátri yfir síðasta Áramótaskaupi.

Könnun Maskínu leiðir í ljós að Áramótaskaup Ríkisútvarpsins að þessu sinni þótti ekki sérstaklega gott.

Ef borið er saman við síðustu ár þá eru aðeins 45 prósent sem telja það mjög gott en til samanburðar voru tæp 85 prósent afar ánægð með Skaupið 2020. Árið 2019 voru 71 prósent á því að skaupið væri gott, 2018 voru 62 prósent á þeirri skoðun en 2017 voru þeir 76 prósent. Árið 2016 voru 60 prósent þeirrar skoðunar að Skaupið hafi þá verið gott.

Könnunin í samanburði við kannanir undanfarinna ára.Maskína

Eins og sjá má á súluritinu hér ofar voru fleiri þeirrar skoðunar en undanfarin ár að Skaupið hafi beinlínis verið slakt eða 31 prósent.

Könnunin var lögð fyrir það sem heitir Þjóðargátt Maskínu, sem er þjóðhópur fólks eða panell, sem dreginn er með tilviljunarkenndu úrtaki úr Þjóðskrá, á netinu. Svarendur eru alls staðar að af landinu og á aldrinum 18 ára og eldri. Í skýringu segir að Svörin hafi verið vegin samkvæmt „mannfjöldatölum Hagstofunnar um kyn, aldur og búsetu, þannig að þau endurspegla þjóðina prýðilega.“ En könnunin fór fram dagana 14. til 19. janúar 2022.

Hér má sjá niðurstöðu greinda út frá búsetu og aldri.Maskína

Sé rýnt í könnunina um afstöðu fólks til Skaupsins nú kemur á daginn að þeir sem búa á Austurlandi voru ánægðastir með grínið eða rúm 42 prósent sem töldu það frekar gott og 14,5 prósent mjög gott. Þeim sem búa á höfuðborgarsvæðinu var síður skemmt. Þá virðist sem fólk á fertugsaldrinum hafi verið fremur spör á hlátrasköllinn því heil 21 prósent í þeim aldursflokki telja Skaupið mjög slakt.

Þá var einnig litið til flokkspólitískra skoðana og hún borin saman við afstöðu til Skaupsins. Þar kemur á daginn að 38,5 prósent stuðningsmanna Flokks fólksins töldu Skaupið frekar eða mjög slakt, Sósíalistar voru neikvæðir sem nemur 37,8 prósentum, Sjálfstæðismenn voru 36,5 ósáttir og 34,3 prósent Miðflokksfólks. Stuðningsmenn annarra flokka fengu svo sem ekki krampa í maga af hlátri en voru sýnu jákvæðari.

Greina má mun eftir flokkspólitískri afstöðu sé litið til afstöðu til Skaupsins.Maskína

Tengdar fréttir

Inga Sæ­land á­nægð með skaupið: „Ég er búin að marg­hlæja að þessu“

Inga Sæland, formaður Flokks fólksins, er hæstánægð með það stóra hlutverk sem hún og hennar flokkur fékk í Áramótaskaupi Ríkisútvarpsins þessi áramótin. Hún er búin að horfa á skaupið þrisvar og hyggst gera það oftar, svo ánægð var hún með það. Hún segist ekki taka það inn á sig að gert hafi verið grín að henni í skaupinu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×