Innherji

Væntingar um bankasölu magna upp sveiflur í Kauphöllinni

Þorsteinn Friðrik Halldórsson skrifar
Það stefnir í að þetta verði versta gengi S&P 500 vísitölunnar í janúarmánuði frá upphafi.
Það stefnir í að þetta verði versta gengi S&P 500 vísitölunnar í janúarmánuði frá upphafi. Spencer Platt/Getty Images

Fjárfestar halda að sér höndum vegna væntinga um sölu ríkissjóðs á stórum hlut í Íslandsbanka en lítil velta í Kauphöllinni hefur þannig magnað upp sveiflur sem rekja má til verðlækkana á erlendum hlutabréfamörkuðum. Viðmælendur Innherja á fjármálamarkaði benda þó á að skráðu íslensku félögin standi á styrkum fótum og samsetning Kauphallarfélaga sé hagfelld í þessum aðstæðum.

„Að okkar mati hefur lítið breyst sem réttlætir þessar lækkanir hérna heima. Félögin í Kauphöllinni standa flest sterk og eru líkleg til þess að skila góðri afkomu á næstunni,“ segir Halldór Kristinsson, forstöðumaður hlutabréfa hjá Landsbréfum.

Miklar hræringar hafa átt sér stað á erlendum hlutabréfamörkuðum. Í gær féll vísitalan S&P 500 um fjögur prósent áður en hún náði sér aftur á strik. Vísitalan sveiflaðist um 4,4 prósent yfir daginn sem er mesta flökt vísitölunnar á einum degi frá því í mars 2020 þegar áhyggjur af kórónuveirunni lituðu fjármálamarkaði.

Í dag lækkaði vísitalan síðan um 2,6 prósent og stefnir í að þetta verði versta gengi S&P 500 í janúarmánuði frá upphafi. Þá hefur heimsvísitala hlutabréfa lækkað um rúm 7 prósent frá áramótum og hefur tæknigeirinn, sem er næmastur fyrir vaxtahækkunum, leitt lækkanirnar.

Á meðal þess að hreyfði við fjárfestum eru væntingar um að Seðlabanki Bandaríkjanna hækki vexti og dragi úr magnbundinni íhlutun, þ.e. uppkaupum á skuldabréfum.

Jay Powell, seðlabankastjóri Bandaríkjanna, hefur lýst því yfir að verðbólga sé „alvarleg ógn“ gagnvart efnahagsbatanum þar í landi en í desember mældist tólf mánaða verðbólga 7 prósent. Hún hefur ekki verið meiri í nærri fjóra áratugi. Ofan á væntingar um vaxtahækkanir bætast síðan vaxandi áhyggjur af átökum í Úkraínu.

Halldór Kristinsson, forstöðumaður hlutabréfa hjá Landsbréfum.

Halldór hjá Landsbréfum segir marga krafta að verki sem leiði til þess að fjárfestar endurverðmeti vaxtarfyrirtæki og einnig félög sem högnuðust óvenjumikið í faraldrinum.

„Við svona miklar hreyfingar koma fram veðköll eftir því sem fjárfestar selja sig niður til að dekka tapið,“ segir Halldór. „Það skilar sér svo inn á innlenda markaðinn í formi minni áhættuvilja og væntinga um framboð innlendra bréfa frá erlendum fjárfestum.“

Úrvalsvísitala Kauphallarinnar hefur lækkað um 6 prósent frá áramótum og þar af um tæp 4 prósent á síðustu þremur viðskiptadögum.

Halldór segir að fjárfestar hafi haldið að sér höndum og búið sig undir sölu á hlut ríkisins í Íslandsbanka. Verðbreytingar á markaðinum hafi því orðið ýktari.

Óðinn Árnason, sjóðstjóri hjá Stefni, tekur í sama streng. „Væntingar um sölu á stórum hlut í Íslandsbanka valda því að fjárfestar eru ansi sparir á lausafé. Velta á markaði hefur því minnkað aðeins og verðbreytingar eru ýktari.“

Við svona miklar hreyfingar koma fram veðköll eftir því sem fjárfestar selja sig niður til að dekka tapið.

Óðinn bendir á að samsetning íslenska markaðarins sé hagfelld á tímum vaxtahækkana. 

„Það er lítið um eiginleg vaxtafélög með sjóðstreymi í fjarlægri framtíð, en á móti meira um virðisfélög sem hafa getað skilað eigendum reglulegum arði. Þannig ættu vaxtahækkanir, hér heima og ytra, að hafa minni áhrif á markaðinn en til dæmis í Bandaríkjunum,“ segir Óðinn. 

Þrátt fyrir að innlendi markaðurinn hafi orðið fyrir áhrifum af lækkunum á erlendis telur Óðinn að til lengri tíma litið eigi þessi fylgni eftir að minnka í ljósi þess að samsetning markaðarins er frábrugðin og hagvaxtarhorfur betri.


Tengdar fréttir

Bankasýslan óskar eftir heimild til að selja restina af Íslandsbanka

Bankasýsla ríkisins lagði í gær fram tillögu til fjármála- og efnahagsráðherra um að stofnunin fái heimild til ársloka 2023 til að selja alla eignarhluti ríkisins í Íslandsbanka í nokkrum áföngum og að höfðu samráði við ráðherra. Þetta kemur fram í tilkynningu á vef stofnunarinnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×