Handbolti

EM-hlaðvarp Seinni bylgjunnar: Mikilvægt að vinna Frakka með svona miklum mun

Hjörtur Leó Guðjónsson skrifar
Viktor Gísli Hallgrímsson varði víti þegar leiktíminn var búinn, en markatalan gæti skipt gríðarlegu máli þegar milliriðlinum lýkur.
Viktor Gísli Hallgrímsson varði víti þegar leiktíminn var búinn, en markatalan gæti skipt gríðarlegu máli þegar milliriðlinum lýkur. Sanjin Strukic/Pixsell/MB Media/Getty Images

Stefán Árni Pálsson og Ásgeir Örn Hallgrímsson fóru yfir ótrúlegan sigur á Frökkum í milliriðlinum á EM í Ungverjalandi í EM-hlaðvarpi Seinni bylgjunnar í dag. Strákarnir hringdu í fyrrverandi landsliðsmanninn Arnór Atlason sem fór yfir hversu mikilvægt það var að vinna leikinn svona stórt.

Markatalan getur nefnilega skipt gríðarlegu máli þegar milliriðillinn er á enda. Góðar líkur eru á að tvö og jafnvel fleiri lið endi með jafn mörg stig, og þá er sterkt að eiga átta marka sigur gegn Ólympíumeisturum Frakka í pokahorninu.

„Af því að við töpuðum með fjórum á móti Danmörku þá þurftum við bara að koma okkur í þannig stöðu að við værum með fjögur mörk í plús,“ sagði Arnór í samtali við strákana.

„Ef að við reiknum með að allt fari þannig að Frakkarnir klári sinn leik og við klárum okkar þá geta öll liðin endað með jafn mörg stig ef Frakkarnir vinna Dani. Þá erum við búnir að tryggja okkur áfram þar af því að við erum komnir með fjögur mörk í plús, eins og Danirnir.“

Eitt af því sem spilaði stórt hlutverk í því hversu stór sigur íslenska liðsins varð var frammistaða Viktors Gísla Hallgrímssonar í markinu. Viktor varði 15 skot í leiknum, en mikilvægasta varsla leiksins kom mögulega þegar sigurinn var fyrir löngu í höfn þegar Viktor varði víti frá Frökkum eftir að leiktíminn var runninn út.

„Þetta er nefnilega lykillinn að þessu, hvað þetta var stór sigur,“ sagði Ásgeir Örn.

„Þessi markvarsla hjá Viktori undir lokin. Hún var risastór,“ bætti Stefán Árni við.

Strákarnir voru ekki alveg tilbúnir að sleppa Arnóri úr símanum og spurðu hann hvað varð til þess að lemstrað lið Íslands gat valtað yfir Ólympíumeistarana.

„Í fyrri hálfleik spilum náttúrulega algjörlega frábæran sóknarleik á móti þeirra 6:0 vörn. Auðvitað vantaði mikið í þristablokkina þeirra. Bæði Luka Karabatic og Ludovic Fabregas. En það er bara þannig eins og í öllum liðum og það vantaði aldeilis í okkar lið líka,“ sagði Arnór.

„Þessi miðjublokk sem þeir spiluðu með, Ómar fór illa með þá alla saman þessar fyrstu þrjátíu mínútur. Maður hafði varla séð annað eins.“

„Svo var líka kannski bara vel séð hjá okkur að Nikola Karabatic stóð tvistinn í vörninni og við sóttum bara á þristana allan fyrri hálfleikinn og tættum þá í okkur.“

Arnóri fannst sóknarleikur íslenska liðsins stirðna aðeins í síðari hálfleik, en hrósaði liðinu þó fyrir mikla skynsemi og aga.

„Svo varð þetta aðeins erfiðara fannst mér í seinni hálfleik sóknarlega, en við spiluðum ótrúlega skynsamlega á móti þessari 5:1 vörn. Við fengum höndina upp næstum því í hverri einustu sókn og svo voru einstaklingsframtök sem halda okkur alltaf í þessari forystu.“

Arnór ræddi svo einnig um varnarleik íslenska liðsins áður en hann fékk að halda áfram inn í daginn. Strákarnir hringdu einnig í Róbert Gunnarsson sem var staddur í skíðaferð fyrir norðan, ásamt því að fara yfir allt það helsta sem gerðist í leik gærdagsins. Hlusta má á allan þáttinn í spilaranum hér fyrir ofan, en spjallið við Arnór hefst á 19:20.


Tengdar fréttir

Karabatic: Við fundum engar lausnir

Nikola Karabatic, einn besti og sigursælasti handboltamaður sögunnar, var að vonum niðurlútur í viðtölum við franska fjölmiðla eftir tapið gegn Íslandi.

Skýrsla Henrys: Eitt stærsta íþróttaafrek Íslandssögunnar

Við skulum bara viðurkenna það. Við áttum öll von á franskri flengingu í kvöld. Skiljanlega reyndar miðað við áföllin hjá strákunum okkar. Lærdómur kvöldsins er að afskrifa ALDREI strákana okkar. Sama hver spilar.

Viktor: Elliði sagði mér að vera reiður

„Það er alla vega langur tími þar til ég gleymi þessari stund. Þetta var sturlað,“ sagði hinn 21 árs gamli Viktor Gísli Hallgrímsson eftir heimsklassaframmistöðu í ótrúlegum sigri Íslands á Ólympíumeisturum Frakklands á EM.

Ómar Ingi: Vorum alvöru lið í kvöld

Ómar Ingi Magnússon var stórkostlegur í leiknum í kvöld og skoraði tíu mörk. Hann var alger lykilmaður í að smíða forystuna í fyrri hálfleik. Hann mæti í viðtal eftir leikinn en varaði við því að fljúga of hátt.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.