Drógu látinn mann inn á pósthús til að innheimta ellilífeyri hans

Árni Sæberg skrifar 22. janúar 2022 22:08

Atvikið varð á pósthúsi á Írlandi. Kinga Krzeminska/Getty

Lögreglan á Írlandi hefur hafið rannsókn á atviki þar sem tveir menn drógu lík látins manns inn á pósthús í þeim tilgangi að fá ellilífeyri hans greiddan út.

Rétt fyrir hádegi í gær gekk maður inn á pósthús í Carlowsýslu á Írlandi og bað starfsmann um að afhenda sér ellilífeyrisgreiðslu annars manns. Hann hafði ekki erindi sem erfiði og yfirgaf þá pósthúsið.

Skömmu seinna sneri hann aftur í fylgd tveggja annarra. Sjónarvottar hafa lýst því fyrir The Irish Independent að svo hafi virst sem tveir menn hafi haldið þeim þriðja uppi á milli sín.

Þá segir að starfsmann pósthússins hafi farið að gruna að eitthvað undarlegt væri á seyði og því neitað að afhenda umbeðinn lífeyri. Heimildarmaður The Irish Independent segir mennina tvo þá hafa haldið því fram að maðurinn væri hugsanlega að fá hjartaáfall.

Niðurstaða krufningar hefur hins vegar leitt í ljós að maðurinn hafi verið látinn í allt að þrjár klukkustundir áður en hann var dreginn inn á pósthúsið. Þó er ekki talið að andlát hans hafi borið að með saknæmum hætti.

Írland Erlend sakamál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.