Handbolti

„Gummi og Ómar Ingi þurfa að finna millilendingu til að hann nýtist“

Ingvi Þór Sæmundsson skrifar
Enn er beðið eftir því að Ómar Ingi Magnússon sýni sparihliðarnar með íslenska landsliðinu.
Enn er beðið eftir því að Ómar Ingi Magnússon sýni sparihliðarnar með íslenska landsliðinu. vísir/hulda margrét

Ásgeir Örn Hallgrímsson og Róbert Gunnarsson segja að nú sé kominn tími á að Ómar Ingi Magnússon, Íþróttamaður ársins 2021, springi út með íslenska landsliðinu. Þeir benda þó á að það sé einnig á ábyrgð þjálfarans, Guðmundar Guðmundssonar.

Ómar Ingi átti frábært ár í fyrra. Hann var marka- og næststoðsendingahæstur í þýsku úrvalsdeildinni, vann EHF-bikarinn og heimsmeistarakeppni félagsliða með Magdeburg sem situr núna á toppi þýsku deildarinnar og hefur unnið alla leiki sína nema einn. Og í árslok var Ómar Ingi valinn Íþróttamaður ársins af Samtökum íþróttafréttamanna.

Þrátt fyrir afar farsælan feril með sínum félagsliðum hefur Ómar Ingi ekki sýnt sparihliðarnar með íslenska A-landsliðinu. Það er því talsverð pressa á Selfyssingnum fyrir Evrópumótið eins og þeir Ásgeir Örn og Róbert ræddu um við Stefán Árna Pálsson í EM-hlaðvarpinu. 

„Jú, algjörlega. Nú viljum við virkilega sjá hann skila sínu. Eins og við vorum að tala um áðan þarf einhver að taka við af Aroni [Pálmarssyni]. Ég vil að við hendum því beint yfir á hann. Leyfum honum að taka fleiri ákvarðanir. En þá verðum við líka að gefa honum tækifæri til að spila vel. Hann verður að fá traust, taktíkin þarf að ganga upp og hann þarf að finna að hann eigi að vera miklu stærri prófíll en hann hefur verið,“ sagði Ásgeir Örn.

„Þetta er bæði hlutverk þjálfarans og hans, að stimpla þetta þannig inn að hann nái sínu fram. Þetta er þarna. Það er ekki nokkur spurning. Þeir þurfa að fá alvöru stöðuga frammistöðu frá honum.“

Róbert tók í sama streng og sagði að Ómar Ingi og Guðmundur þyrftu að mætast á miðri leið til að hann gæti blómstrað inni á vellinum.

„Þetta er tveggja manna dans. Gummi þarf að nota hann rétt og hann þarf líka að aðlaga sig að leiknum hans Gumma. Eins og við töluðum oft um með Óla Stef þegar hann var í Ciudad Real. Hann ætlaði bara að spila eins og þar en við vorum bara ekki nógu góðir til að geta það. En um leið og hann kom niður um fimm hæðir til okkar fór liðið að smella,“ sagði Róbert. 

„Það skiptir ekki alltaf máli hvaða taktík eða kerfi þú spilar, heldur að allir spili það sama. Þarna þurfa Gummi og Ómar að ná saman og finna einhverja millilendingu til að hann nýtist. Hann var frábær í Danmörku og búinn að vera frábær í Þýskalandi.“

Ómar Ingi er á leið á sitt fimmta stórmót með íslenska landsliðinu. Hann hefur leikið 21 leik á stórmóti og skorað 38 mörk.

Fyrsti leikur Íslands á EM er gegn Portúgal annað kvöld klukkan 19:30.


Tengdar fréttir

Viggó vonast til að fá stórt hlutverk

„Hótelið er mjög fínt þó svo það sé aðeins minna um sóttvarnir hérna en í Egyptalandi í fyrra,“ segir skyttan Viggó Kristjánsson jákvæð á hóteli íslenska liðsins í gær.

Guð­mundur búinn að vera í ein­angrun síðan fyrir jól

Guðmundur Guðmundsson, þjálfari íslenska landsliðsins í handbolta, skilur lítið í sóttvarnarreglum – eða skorti þar á – Evrópumótsins í handbolta. Guðmundur hefur svo gott sem verið í einangrun síðan fyrir jól.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.