Erlent

Herinn kallaður til að manna stöður á sjúkrahúsum í Lundúnum

Hólmfríður Gísladóttir skrifar
Þetta er ekki í fyrsta sinn sem stjórnvöld leita á náðir hersins í kórónuveirufaraldrinum en hermenn hafa víða aðstoðað við sýnatökur og bólusetningar.
Þetta er ekki í fyrsta sinn sem stjórnvöld leita á náðir hersins í kórónuveirufaraldrinum en hermenn hafa víða aðstoðað við sýnatökur og bólusetningar. epa/Peter Powell

Um það bil 200 hermenn hafa verið kallaðir til starfa á sjúkrahúsum í Lundúnum til að mæta auknum fjölda Covid-veikra og fjölda veikra starfsmanna. Fjörtíu herlæknar munu aðstoða við umönnun sjúklinga en aðrir innrita sjúklinga og halda utan um birgðastöðu, svo eitthvað sé nefnt.

Sumir hermannanna hafa þegar hafði störf á sjúkrahúsunum og verða við störf þar til í lok mánaðarins.

Boris Johnson, forsætisráðherra Bretlands, sagðist fyrir tveimur dögum vona að Bretar gætu „stigið ölduna“ án þess að þurfa að grípa til frekari sóttvarnaðgerða. Hann gekkst þó við því að líklegast myndi hið bráðsmitandi ómíkron-afbrigði valda því tímabundið að einhverjar heilbrigðisstofnanir myndu ekki ráða við álagið.

Stéttarfélög heilbrigðisstarfsmanna segja þá ráðstöfun að kalla inn herinn hins vegar sýna að stjórnvöld geti ekki lengur hummað fram af sér áhyggjur manna af því hvort heilbrigðiskerfið muni geta sinnt hlutverki sínu á öruggan hátt. Þúsundir heilbrigðisstarfsmanna í Lundúnum hafa verið frá vinnu í viku hverri.

Þeir segja ástandið núna ekki bara tilkomið vegna kórónuveirufaraldursins, heldur langvarandi undirmönnunar. 

179.756 greindust með Covid-19 á Bretlandseyjum í gær. Hlutfall þeirra sem greinast með ómíkron fer stækkandi. Um 29 prósent fleiri hafa greinst með veiruna síðustu sjö daga en sjö dagana þar á undan.

The Guardian fjallar ítarlega um málið. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.