Lífið

Leik­stjórinn Peter Bogda­no­vich er fallinn frá

Atli Ísleifsson skrifar
Peter Bogdanovich á frumsýningu árið 2007.
Peter Bogdanovich á frumsýningu árið 2007. AP

Bandaríski kvikmyndaleikstjórinn Peter Bogdanovich er látinn, 82 ára að aldri. Hann leikstýrði á ferli sínum stórmyndum á borð við The Last Picture Show frá árinu 1971 sem tilnefnd var til átta Óskarsverðlauna.

Bogdanovich var frá New York og var hluti þeirrar bylgju kvikmyndaleikstjóra á áttunda áratugnum sem kennd var við Nýju-Hollywood.

The Last Picture Show fjallaði um ástir og örlög ungmenna í smábæ í Texas og skartaði leikurum á borð við Jeff Bridges og Cybill Shepherd.

Árið 1973 leikstýrði hann myndinni Paper Moon sem skartaði feðginunum Ryan og Tatum O'Neal í aðalhlutverkum sem loddararnir Moses Pray og Addie Loggins.

Fyrir átta árum sneri Bogdanovich aftur í leikstjórastólinn og leikstýrði þá sinni fyrstu mynd í þrettán ár. Var það myndin She‘s Funny That Way með Owen Wilson og Imogen Poots í aðalhlutverkum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.