Innlent

Elstu bekkir í Laugarnesskóla verða heima

Kolbeinn Tumi Daðason skrifar
Sigríður Heiða Bragadóttir er skólastjóri í Laugarnesskóla.
Sigríður Heiða Bragadóttir er skólastjóri í Laugarnesskóla.

Sigríður Heiða Bragadóttir, skólastjóri í Laugarnesskóla sem er fyrir nemendur í 1. bekk og upp í 6. bekk, hefur ákveðið að nemendur í elstu tveimur árgöngunum mæti ekki í skólann þessa vikuna. Endurskoða á stöðuna í lok viku. Ástæðan er forföll kennara vegna kórónuveirufaraldursins. Yngri krakkar fá forgang í skólann.

Starfsdagur er í skólum á höfuðborgarsvæðinu í dag þar sem starfsfólk ræður ráðum sínum fyrir vikuna. Skólastjóri Melaskóla sagði í hádegisfréttum Bylgjunnar að hann ætti von á að fjöldi nemenda og kennara yrðu frá vegna Covid-19 smits enda viðbúið að fólk mæti smitað í skólastofuna þar sem nemendur og kennarar séu svo til óvarðir.

Nýgengi innanlandssmita er í augnablikinu 2544 en þar er miðað við fjórtán daga nýgengi á hverja eitt hundrað þúsund íbúa. 25 eru á sjúkrahúsi með Covid-19. Sjö á gjörgæslu og fimm í öndunarvél. Allir nema einn eru óbólusettir.

Færri börn en venjulega munu nýta þessi leiktæki við Laugarnesskóla í vikunni en alla jafna.Vísir/Vilhelm

Sigríður Heiða segir í tölvupósti til forráðamanna að aukning í útbreiðslu Covid-19 hafi þegar haft þau áhrif að nokkur fjöldi kennara og starfsfólks sé frá störfum vegna sóttkvíar og einangrunar.

„Því hefur verið ákveðið að nemendur í fimmta og sjötta bekk mæti ekki í skólann þessa viku, en staðan verði endurskoðuð í lok vikunnar þegar skýrist hvernig útbreiðsla þróast. Þetta er gert til að geta að halda út kennslu fyrir yngri nemendur samkvæmt tilmælum okkar yfirmanna,“ segir Sigríður Heiða.

Fram kom í máli Helga Grímssonar, sviðsstjóra skóla- og frístundasviðs, í kvöldfréttum í gær að nemendur á yngri stigum væru í forgangi.

Helgi Grímsson segir svo sannarlega ugg í mörgum nú þegar skólarnir séu að fara af stað á nýjan leik.Vísir/Helena Rakel

„Við vonumst auðvitað til þess að smitum fari fækkandi sem fyrst og að þá geti allir nemendur komið í skólann. Verði þróunin í aðra átt og ekki reynist unnt að taka á móti öllum nemendum verður brugðist við því með fjarkennslulausnum og verður þá haft samband við foreldra og forráðamenn í þessum árgöngum sérstaklega.“

Sigríður Heiða brýnir til forráðamanna að halda nemendum heima sýni þeir minnstu einkenni.

„Ef foreldrar og forráðamenn kjósa að halda börnum sínum heima til öryggis fyrstu dagana sýnir skólinn því fullan skilning en við bendum á að skrá þarf slík forföll,“ segir Sigríður og vísar á Mentor og eyðublað á heimasíðu skólans.

Jón Viðar Matthíasson slökkviliðsstjóri á höfuðborgarsvæðinu er framkvæmdastjóri almannavarnanefndar.Vísir/Vilhelm

Almannavarnarnefnd höfuðborgarsvæðisins segir í tilkynningu til skóla að viðbúið sé að röskun geti orðið á starfsemi leikskóla, grunnskóla, frístundaheimila, félagsmiðstöðva og tónlistarskóla á komandi dögum.

„Gera má ráð fyrir að loka þurfi deildum í leikskólum og fella niður kennslu í einstökum árgöngum eða stærri hópum í grunnskólum, um skemmri eða lengri tíma,“ segir í tilkynningunni.

Stjórnendur muni að öllu jöfnu reyna að leysa forföll eins og hægt er.

„Þessi síðasta bylgja faraldursins hefur haft mikil áhrif og eru stjórnendur og starfsfólk að geraallt til að röskun sé sem minnst. Til þess að styðja við þá viðleitni þurfa foreldar ogforráðamenn að huga vel að persónubundnum sóttvörnum, börn eiga ekki að mæta í skólameð kvef einkenni, verði þeirra vart þarf að fara í PCR próf.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.