Viðskipti innlent

Lands­virkjun hagnaðist um þrettán milljarða

Eiður Þór Árnason skrifar
Hörður Arnarson, forstjóri Landsvirkjunar.
Hörður Arnarson, forstjóri Landsvirkjunar. Vísir/Vilhelm

Landsvirkjun hagnaðist um 102,6 milljónir Bandaríkjadali eða 13,3 milljarða króna á fyrstu níu mánuðum ársins og er fjármunamyndun í sögulegum hæðum. Hagnaður nam 61,2 milljónum Bandaríkjadala á sama tímabili í fyrra.

Rekstrartekjur námu 396,9 milljónum Bandaríkjadala á fyrstu þremur ársfjórðungum eða 51,6 milljarði króna og hækka um 21% milli ára.

Þetta kemur fram í fjárhagsuppgjöri Landsvirkjunar. Forstjóri Landsvirkjunar segir að hagur viðskiptavina hafi haldið áfram að vænkast á þriðja ársfjórðungi ársins, sem hafi jafnt og þétt aukið raforkunotkun sína samhliða aukinni eftirspurn eftir framleiðslu þeirra.

Eftirspurnin sé í mörgum tilvikum orðin meiri en hún var í upphafi faraldursins. Flestir viðskiptavinir keyri nú á fullum afköstum og raforkukerfi Landsvirkjunar nálgist það að vera fullnýtt.

Nettó skuldir Landsvirkjunar lækkuðu um 138,4 milljónir Bandaríkjadala eða 18 milljarða króna frá áramótum og voru í lok september um 200 milljarðar króna.

Handbært fé frá rekstri nam 239,1 milljón Bandaríkjadala eða 31,1 milljarði króna, sem er 40,8% hækkun frá sama tímabili árið áður.

Raforkuverð hækkað mikið milli ára

„Meðalálverð á tímabilinu var nærri helmingi hærra en á sama tíma árið áður, auk þess sem raforkuverð á Nord Pool markaðinum fimmfaldaðist, eftir sögulega lágt verð í fyrra. Þar sem hluti samninga okkar við stórnotendur er bundinn við þessar tvær breytur hækkuðu tekjur mikið, eða um 69 milljónir dollara miðað við sama tímabil árið 2020,“ segir Hörður Arnarson, forstjóri Landsvirkjunar í tilkynningu. Afkoma fyrstu níu mánuðina beri þess greinileg merki.

Að sögn hans hefur rekstur aflstöðva gengið vel á fyrstu níu mánuðum ársins þó miðlunarlón á Suðurlandi hafi verið með minnsta móti í sumar.

„Hagnaður fyrir óinnleysta fjármagnsliði, sem er sá mælikvarði sem við lítum til við mat á rekstri fyrirtækisins, hækkaði um tæplega 67% frá sama tímabili árið 2020. Nettó skuldir héldu áfram að lækka og voru í lok fjórðungsins 18 milljörðum króna lægri en um síðustu áramót.“

Hörður segir að mikill kraftur hafi verið í nýsköpunarstarfi á árinu, til að mynda með undirbúningi að rafeldsneytisframleiðslu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.