Innlent

Deila Atla Rafns og Persónuverndar komin á byrjunarreit

Kolbeinn Tumi Daðason skrifar
Atli Rafn með lögmanni sínum Einari Þór Sverrissyni í Héraðsdómi Reykjavíkur.
Atli Rafn með lögmanni sínum Einari Þór Sverrissyni í Héraðsdómi Reykjavíkur. Vísir/Egill

Landsréttur vísaði í dag frá máli Atla Rafns Sigurðarsonar gegn Persónuvernd. Málskostnaður fyrir báðum dómstigum fellur niður. Atli Rafn hafði áður haft betur í baráttu sinni við Persónuvernd fyrir héraðsdómi en Persónuvernd áfrýjaði dómnum.

Atla Rafni var sem kunnugt er sagt upp störfum í Borgarleikhúsinu og höfðaði mál á hendur Leikfélagi Reykjavíkur. Eftir tveggja ára baráttu fyrir dómi fékk Atli Rafn dæmdar 1,5 milljónir króna í miskabætur vegna uppsagnarinnar.

Atli Rafn stefndi leikfélaginu árið 2019 vegna ólögmætrar uppsagnar hjá Borgarleikhúsinu og ærumeiðinga eftir að hann var sakaður um kynferðislega áreitni. Hann fór fram á alls 13 milljónir í bætur.

Landsréttur taldi að Atli Rafn hefði þurft að stefna ekki aðeins Persónuvernd heldur einnig Leikfélagi Reykjavíkur.

Krafðist aðgangs að upplýsingum í vinnuskjali

Atli Rafn var ósáttur við að fá ekki að vita hvað hann væri sakaður um, sem leiddi til uppsagnar. Kvartaði hann til Persónuverndar vegna synjunar Borgarleikhússins á beiðni hans um upplýsingar um efni og uppruna kvartana gegn honum. 

Þær var að finna í vinnuskjali Kristínar Eysteinsdóttur, þáverandi leikhússtjóra.

Persónuvernd komst að þeirri niðurstöðu að hluteigandi einstaklingar yrðu ekki látnir sæta því að trúnaður sem leikhússtjóri hafði heitið þeim þyrfti að víkja vegna hagsmuna Atla Rafns. Því hefði Kristínu ekki verið skylt að veita honum upplýsingarnar.

Héraðsdómur féllst á málatilbúnað lögmanns Atla

Atli Rafn stefndi Persónuvernd vegna þessa og féll dómur í héraði í júní 2020. Úrskurður Persónuverndar var felldur úr gildi og stofnunin dæmd til að greiða Atla Rafni 950 þúsund krónur í málskostnað.

Landsréttur komst hins vegar að þeirri niðurstöðu í dag að vísa málinu frá héraðsdómi. Bendir það til þess að Landsrétti hafi fundist eitthvað athugavert við stefnuna í málinu. 

Uppfært klukkan 15:52

Í dómi Landsréttar, sem birtur var á vef réttarins klukkan 15:30,  var rakið að ekki færi á milli mála að úrskurður sá sem Atli Rafn krefðist að felldur yrði úr gildi lyti að skyldum Leikfélags Reykjavíkur gagnvart Atla Rafni á grundvelli persónuverndarlaga. Leikfélag Reykjavíkur hefði án nokkurs vafa átt aðild að málinu hjá Persónuvernd.

Í dómaframkvæmd Hæstaréttar hefði því ítrekað verið slegið föstu að þegar krafist væri ógildingar á úrlausn stjórnvalds yrðu þeir sem voru aðilar að stjórnsýslumálinu að eiga aðild að málinu fyrir dómi enda ættu þeir einstaklegra, beinna, verulegra og lögvarinna hagsmuna að gæta.

Krafa um ógildingu úrskurðar Persónuverndar hafi einkum verið rökstudd af hálfu Atla Rafns með því að niðurstaða hans fengi ekki staðist efnislega og Leikfélag Reykjavíkur bæri ríkari skyldur gagnvart Atla Rafni samkvæmt lögum um persónuvernd. Leikfélagið ætti einstaklegra, beinna, verulegra og lögvarinna hagsmuna að gæta af úrlausn þeirrar kröfu.

Í því ljósi og þar sem málið var ekki höfðað gegn Leikfélagi Reykjavíkur komst Landsréttur ekki hjá því að vísa málinu frá héraðsdómi án kröfu.


Tengdar fréttir

Hæstiréttur fellst á aðra af tveimur beiðnum Atla Rafns

Hæstiréttur hefur veitt Atla Rafn Sigurðarsyni áfrýjunarleyfi í máli hans gegn Leikfélagi Reykjavíkur. Telur rétturinn að málið geti verið fordæmisgefandi. Hæstiréttur hafnaði hins vegar áfrýjuarbeiðni Atla Rafns í málinu gegn Kristínu Eysteinsdóttur, fyrrverandi leikhússtjóra Borgarleikhússins.

Borgar­leik­húsið og Kristín sýknuð af kröfu Atla Rafns í Lands­rétti

Landsréttur sýknaði í dag Leikfélag Reykjavíkur og Kristínu Eysteinsdóttur fyrrverandi Borgarleikhússtjóra af kröfu Atla Rafns Sigurðssonar leikara. Héraðsdómur dæmdi stjórn leikfélagsins og Kristínu í fyrra til að greiða Atla Rafni 5,5 milljónir króna í bætur vegna ólögmætrar uppsagnar og ærumeiðingar.

Atli Rafn hafði betur gegn Persónuvernd

Atli Rafn Sigurðsson leikari hafði betur í máli sem hann höfðaði gegn Persónuvernd og þarf Persónuvernd að greiða 950 þúsund krónur í málskostnað.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.