„Það er allt að springa hérna“

„Mér finnst þetta bara vera mjög alvarleg staða, það er allt að springa hérna hérna út af þessu og það virðist eins og það þurfi að loka meiru til þess að smitum hætti að fjölga svona,” segir Sólveig Hólmfríður Sverrisdóttir, deildarstjóri Covid-göngudeildar.

Frá 1. nóvember hafa 958 manns greinst smitaðir af Covid19 hér á landi eða um 136 manns á dag að meðaltali. Þar af greindist metfjöldi í dag, eða 168 manns.

„Ég hef miklar áhyggjur af þessu. Það er mjög kvíðvænlegt að við náum ekki að ráða við þetta, það yrði bara hræðilegt ef við gætum ekki ráðið við þetta. Þó við reynum allt sem við getum og stöndum hér allan daginn og allt kvöldið að ef við lendum í þeirri stöðu að við getum ekki ráðið við þetta – það er ekki staða sem við viljum lenda í,” segir Sólveig.

„Maður hefur heyrt sögur erlendis frá af svoleiðis aðstæðum og við viljum það bara ekki hér, það er bara svoleiðis.”