Telur verulega hættu á nýjum stríðsátökum í Bosníu og Hersegóvínu

Gunnar Reynir Valþórsson skrifar 2. nóvember 2021 08:01

Fulltrúar EUFOR, friðargæslusveitar á vegum Evrópusambandsins í Bosníu og Hersegóvínu, telja nú um sjö hundruð. Getty

Hætta er á því að Bosnía og Hersegóvína brotni upp í smærri einingar og verulegar líkur eru taldar á því að stríðsátök brjótist þar út á ný.

Þetta segir Christian Schmidt, sendifulltrúi Sameinuðu þjóðanna í Bosníu í nýrri skýrslu.

Schmidt bendir á að aðskilnaðarsinnar Serba í landinu hafi hug á því að stofna eigin her, eða kljúfa núverandi her í tvennt eftir þjóðerni. Gangi það eftir verði Sameinuðu þjóðirnar að bæta í friðargæslusveitir sínar í landinu.

Nú eru um sjö hundruð friðargæsluliðar í Bosníu en það fyrirkomulag kemur til endurskoðunar í öryggisráði Sameinuðu þjóðanna síðar í vikunni. Rússar hafa lýst sig andsnúna því að fyrirkomulagið verði áfram með sama hætti og verið hefur.

Leiðtogi Bosníu Serba, Milorad Dodik, hefur hótað því að draga Serba út úr öllum ríkisstofnununum, þar á meðal hernum og vill hann að stjórnarherinn hafi sig á brott frá þeim hluta landsins þar sem Serbar búa en í Bosníu Hersegóvínu búa auk Serba Bosníumenn og Króatar.

Hann hefur einnig talað fjálglega um að hann eigi vini sem muni aðstoða Serba í baráttu sinni, og á þar væntanlega við Rússa.

Bosnía og Hersegóvína Sameinuðu þjóðirnar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.