Innlent

Efast um að borgin kaupi fleiri smáhýsi

Kristín Ólafsdóttir skrifar
Heiða Björg Hilmisdóttir, formaður velferðarráðs Reykjavíkurborgar.
Heiða Björg Hilmisdóttir, formaður velferðarráðs Reykjavíkurborgar. Vísir/Einar

Smáhýsi fyrir heimilislausa hafa nú verið ónotuð í geymslu í rúmt ár þar sem erfiðlega hefur gengið að finna þeim samastað. Formaður velferðarráðs Reykjavíkur segir andstöðu við málið hafa komið sér á óvart og efast um að borgin kaupi fleiri smáhýsi.

Reykjavíkurborg keypti alls tuttugu smáhýsi, sem hugsuð eru sem tímabundin lausn fyrir heimilislausat fólk. Fimm hýsum hefur verið komið fyrir í Gufunesi og þá er nú verið að koma öðrum fimm fyrir í borginni en samþykktar hafa verið staðsetningar í til dæmis Laugardal og á Höfða.

Ekki hafa allir verið á eitt sáttir með fyrirætlanir borgarinnar og borið hefur á nokkuð háværri andstöðu íbúa við fyrirhugaða smáhýsastaði, til dæmis í Hlíðum og Laugardal.

„Það hafa komið upp fordómar og hræðsla og annað slíkt, aðeins meira heldur en ég bjóst við, en mér finnst við vera að læra mjög mikið á þessu, ekki bara við í pólitíkinni og inni í kerfinu heldur bara við Reykvíkingar,“ segir Heiða Björg Hilmisdóttir, formaður velferðarráðs Reykjavíkurborgar og borgarfulltrúi Samfylkingar.

„Það hafa ekki allar lóðirnar gengið upp sem við höfum farið af stað með og það er líka bara alveg eðlilegt, þannig að þetta má taka tíma en þetta hefur kannski tekið fulllangan tíma samt.“

Tíu smáhýsi eru nú geymd í Skerjafirði. Þau hafa staðið óhreyfð í um ár.Vísir/Einar

Þá bendir Heiða á að svona verkefni hafi gefist vel í Danmörku. En af hverju gengur það svona erfiðlega hér?

„Ég held að við séum styttra komin í því að átta okkur á að í samfélaginu erum við allskonar og við berum ábyrgð á hvort öðru. Ég held að það vanti pínu þennan skilning. Að ég segi „ég vil ekki fá svona fólk í hverfið mitt“. Ég hef bara ekkert um það að segja.“

Gripið hafi verið til annarra úrræða og heimilislausir því ekki þurft að líða fyrir seinaganginn. Framvegis verði einblínt á aðrar lausnir fyrir heimilislausa í Reykjavík.

„Ég efast reyndar um að við kaupum fleiri smáhýsi og þá biðla ég til Reykvíkinga að þeir taki fólki opnum örmum inni í fjölbýlishúsum og inni í hverfum þar sem við erum að kaupa íbúðir því, þetta er bara verkefni sem við verðum að fara öll í saman,“ segir Heiða.

Andstaða íbúa vonbrigði

Marín Þórsdóttir, forstöðumaður Rauða krossins, segir smáhýsin bjóða upp á fjölbreytileika í húsakosti sem stendur Reykvíkingum til boða.

„Af því að við erum ekki öll eins þá eru ólík húsnæði sem henta ólíkum einstaklingum. Við fögnuðum mjög þegar þessi smáhýsi komu, en svo virðist vera að það séu ekki allir á sama máli. Okkur þykir miður að borgin sé að fara þessa leið því þessi hópur hefur ekki í þau hús að venda sem hann hafði fyrir,“ sagði Marín í beinni útsendingu í kvöldfréttum Stöðvar 2 í kvöld.

Hún segir vandamálið ekki leyst, þar sem hópurinn sem undir er sé enn húsnæðislaus.

„Við teljum ekki að húsnæðið sé vandamálið, heldur akkúrat lausnin á vandamálinu.“

Hún segir Rauða krossinn harma að fleiri smáhýsi verði ekki keypt.

„Af því að þetta er flóra af húsnæði sem hentar mjög vel fyrir ákveðinn hóp með flókna þjónustuþörf.“

Marín segir vonbrigði að íbúar í hverfum borgarinnar setji sig upp á móti smáhýsunum, sem hún ítrekar að sé lausn á húsnæðisskorti þess fólks sem þeim er ætlað að þjóna.

„Á daginn er fólk þá ekki í húsnæði og þarf þá að leita annað. Ef það hefur tök á að vera í eigin húsi þá er fólk þar. Rannsóknir hafa sýnt að fyrsta leiðin til að ná tökum á góðu lífi er að vera í góðu húsnæði. Þar er hægt að byggja upp lífið, ef maður hefur húsakost. Ef þú ert alltaf að leita að næturstað nóttu eftir nóttu, þá er erfitt að byggja upp einhvers konar líf.“


Tengdar fréttir

Leggjast gegn smá­hýsum fyrir heimilis­lausa í Laugar­dal

Borgar­full­trúum Sjálf­stæðis­flokksins líst ekkert á á­form meiri­hlutans um að koma upp smá­hýsum fyrir heimilis­laust fólk í Laugar­dalnum og finnst að dalurinn eigi að „fá að vera í friði fyrir í­búða­á­formum“. Meiri­hlutinn vill koma þeim fyrir í Laugar­dalnum þar sem ekki hefur reynst auð­velt að ná sátt um slík úr­ræði fyrir heimilis­lausa í í­búða­byggð.

„Sárt að sjá að í­búar smá­hýsa hafi orðið fyrir að­kasti“

Formaður velferðarráðs Reykjavíkurborgar segir sárt að sjá að íbúar smáhýsa í Gufunesi hafi orðið fyrir innbrotum og ónæði. Hann segir verkefnið, að úthluta heimilislausum húsnæði í smáhýsum, enn að nýtt og segist bjartsýnn á að verkefnið muni ganga vel.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.