Bjarni: Tek ekkert jákvætt úr þessum leik

„Við áttum ekkert skilið úr þessum leik. Þetta var framhald frá leiknum gegn Val, núna vorum við enn lélegri. Ég vona að lykilleikmenn í mínu liði vakni eftir svona frammistöðu,“ sagði Bjarni Magnússon.

Haukar byrjuðu leikinn illa og þurfti Bjarni að taka leikhlé í stöðunni 6-15 þegar fimm mínútur voru liðnar af leiknum.

„Við byrjuðum leikinn rosalega flatar. Við leyfðum þeim að ýta okkur úr öllum aðgerðum. Ég get ekki tekið neitt jákvætt úr þessum leik. Þetta var afar lélegt frá upphafi til enda. Njarðvík átti sigurinn skilið.“

Í 4.leikhluta gerði Njarðvík ellefu stig í röð sem fór langt með sigur nýliðanna.

„Mér fannst við aldrei ná neinu augnabliki eða sjálfstrausti í leiknum. Það finnst mér afar sérstakt. Við förum ekki á taugum eftir tap í fyrstu umferð það er bara næsti leikur.“

Næsti leikur Hauka er gegn Keflavík í Blue-höllinni á sunnudaginn og vonar Bjarni að hans lið spili betur en í kvöld.

„Ég ætla að vona að við lærum af svona leik. Ég set pressu á lykilleikmennina hjá okkur heldur en þær yngri að axla ábyrgð eftir þennan leik og mæta sterkari til leiks gegn Keflavík,“ sagði Bjarni Magnússon.