Lífið

Arna Ýr deilir mynd­bandi af fæðingu sonar síns

Elma Rut Valtýsdóttir skrifar
Hér Arna Ýr ásamt Vigni kærasta sínum og nýfæddum syni þeirra, Nóa Hilmari. Arna vill deila fæðingarmyndbandinu sínu með öðrum til þess að miðla sinni jákvæðu reynslu áfram.
Hér Arna Ýr ásamt Vigni kærasta sínum og nýfæddum syni þeirra, Nóa Hilmari. Arna vill deila fæðingarmyndbandinu sínu með öðrum til þess að miðla sinni jákvæðu reynslu áfram. Anna Maggý

Fegurðardrottningin og hjúkrunarfræðineminn Arna Ýr Jónsdóttir ákvað að deila afar persónulegu myndbandi af fæðingu sonar síns. Hún segir neikvæðar fæðingarsögur vera háværar í samfélaginu. Með birtingu myndbandsins vill hún sýna þeim sem eiga von á sínu fyrsta barni að fæðingar geti líka verið rólegar og fallegar.

Arna Ýr fæddi soninn Nóa Hilmar þann 21. júní síðastliðinn. Fæðingin var afar náttúruleg en Nói Hilmar fæddist í rósabaði uppblásinni sundlaug í stofunni heima hjá þeim.

„Að fæða barn í stofunni heima á bjartasta degi ársins eða sumarsólstöðum og á afmælisdegi eldra barnsins okkar er ólýsanlega falleg tilfinning. Kvöldið var kyrrlátt, töfrandi og fullt af sterkri og ákveðinni orku,“ segir Arna um fæðinguna.

Nói Hilmar er annað barn hennar og kærasta hennar, Vignis Bollasonar. Fyrir eiga þau hina tveggja ára gömlu Ástrós Mettu sem deilir einmitt afmælisdegi með bróður sínum.

„Ég vissi nákvæmlega hvað ég væri að fara út í og ákvað að njóta fæðingarinnar í stað þess að kvíða fyrir næstu hríð. Það er svo einstakt að fæða barn.“

„Ég vil trúa því að hugurinn minn hafi tekið mig langa leið í báðum fæðingunum mínum“

Arna Ýr er í nemi í hjúkrunarfræði við Háskóla Íslands til þess að geta einn daginn látið draum sinn rætast og orðið ljósmóðir.

„Hugmyndafræði ljósmæðra segir að fæðing sé fullkomlega eðlilegt og náttúrulegt ferli þar til annað kemur í ljós. Það er einmitt ástæðan fyrir því að ég vildi fæða heima. Ég er örugg heima hjá mér. Ég er svakalega þakklát fyrir að eiga góðar fæðingar að baki en það er alls ekki sjálfgefið.“

Í kjölfar fyrri fæðingar Örnu sagði hún í viðtali við Vísi að hún upplifði að það væri tabú að ræða vel heppnaðar meðgöngur og fæðingar.

Sjá: Móðurmál: Arna Ýr segir góða reynslu af meðgöngu vera tabú

Þegar Arna gekk með sitt fyrsta barn segist hún hafa fundið lítið sem ekkert af íslenskum fæðingarsögum sem voru jákvæðar. Þar af leiðandi hafi hún orðið smeyk fyrir fæðingunni. Hún segist þá hafa brugðið á það ráð að skoða frekar erlendar fæðingarsögur á YouTube.

„Þá sá ég fljótt að helmingur fæðinganna þar var jákvæður og án vandamála. Ég ákvað því að halda í það og sjá fyrir mér góða fæðingu. Ég vil trúa því að hugurinn minn hafi tekið mig langa leið í báðum fæðingunum mínum.“

Arna vill því deila fæðingarmyndbandinu sínu með öðrum til þess að miðla sinni jákvæðu reynslu áfram.

„Mér finnst mikilvægt að pör sem ganga með sitt fyrsta barn fái að sjá góða fæðingu, því eins og gengur og gerist þá heyrist hærra í erfiðum reynslusögum.“

Hér að neðan má sjá fæðingarmyndband Örnu. Myndataka var í höndum Önnu Maggýar, æskuvinkonu Örnu ásamt Dóru Dúnu. Chrissie Guðmundsdóttir, vinkona Örnu leikur á fiðlu undir myndbandinu og Einar Bjartur spilar á píanó. Arna og Vignir eru þeim öllum ævinlega þakklát.


Tengdar fréttir

Arna Ýr fæddi soninn í rósabaði í stofunni heima

„Öllum líður vel, fæðingin tók bara þrjár til fjórar klukkustundir og hann er átján merkur,“ segir fegurðardrottningin og samfélagsmiðlastjarnan Arna ýr Jónsdóttir í samtali við Vísi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.