Innlent

„Trén hafa virkilega miklar tilfinningar“

Magnús Hlynur Hreiðarsson skrifar
Ragnhildur Sigurðardóttir faðmaði þessa ösp í gærkvöldi. Öspin hefur nú verið felld.
Ragnhildur Sigurðardóttir faðmaði þessa ösp í gærkvöldi. Öspin hefur nú verið felld. Vísir/Magnús Hlynur

Bæjarfulltrúi minni hlutans í Árborg undrast mjög aðgerðir bæjaryfirvalda í gærkvöldi þegar níu aspir við þjóðveg eitt, á Austurvegi á Selfossi, voru felldar. Bæjarstjórinn segir málið snúast fyrst og fremst um umferðaröryggi og um ósk Vegagerðarinnar að trén yrðu felld.

Austurveginum var lokað á kafla í gærkvöldi þar sem asparfellingarnar fóru fram. Aspirnar hafa verið þarna í tugi ára og margir á þeirri skoðun að þær hafi verið mikið bæjarprýði, sem götutré á meðan aðrar hafa blótað þeim í sand og ösku og viljað losna við þær. Níu tré voru felld í gærkvöldi, flest tólf til fimmtán metrar á hæð.

Fulltrúi fréttastofu var á Austurveginum á Selfossi í gærkvöldi og tók fólk tali.

„Það eru þrjár vikur síðan Vegagerðin ræddi þetta við okkur á fundi og mæltist eindregið til þess að við gerðum þetta til að uppfylla öryggi,“ segir Gísli Halldór Halldórsson, bæjarstjóri í Árborg.

Hann geti ekki fullyrt sjálfur að aðgerðin auki öryggi.

„Ég get svo sem ekkert lagt mat á það persónulega. En af því Vegagerðin telur að svo sé og flutningabílstjórar hafa bent á að það sjáist illa til gangandi vegfarenda.“

Hjartans mál fyrir fjölda íbúa

Kjartan Björnsson bæjarfulltrúi í Árborg frétti ekki af málinu í starfi sínu heldur heyrði hann af því utan úr bæ.

„Mér finnst ekki eðlilegt sem kjörinn fulltrúi að maður skuli frétt úti í bæ þegar teknar eru ákvarðanir sem mér finnst skipta almenning hér mjög miklu máli,“ segir Kjartan.

„Þetta er hjartans mál hjá fjölda íbúa, þar á meðal fyrir mig.“

Og ekki síður Ragnhildi Sigurðardóttur, íbúa á Selfossi. Hún mætti á svæðið, tók utan um aspirnar og kvaddi þær sem voru felldar.

Þakkaði trénu fyrir allt saman

„Ég er bara að styrkja tréð. Takk fyrir að hafa verið hérna. Það er algjör synd að þetta tré sé að fara,“ sagði Ragnhildur í faðmlögum við eina öspina í gær. Hún hefði viljað að skoðað yrði að snyrta trén og auka sýnileika. Ekki hefði þurft að ráðast í að fella trén.

„Trén hafa virkilega miklar tilfinningar.“

Samúel Torfi Pétursson, skipulagsverkfræðingur sem starfað hefur að umferðaröryggi um árabil, telur að aðgerðin geti haft öfug áhrif.

„Í mínum augum virkar aðgerðin svolítið yfirdrifin sem fyrsta aðgerð. Það neikvæða í því er að núna er yfirbragð götunnar meira hvetjandi til hraðaksturs heldur en áður. Þetta hefur líka neikvæð áhrif á umferðaröryggi,“ sagði Samúel í hádegisfréttum Bylgjunnar.

Tré auki almennt umferðaröryggi

Samúel Torfi segir að í stað þess að fella allar aspirnar hafi mátt snyrta stofnana og þá yrðu þær bara eins og götulampar. Trjábolir séu ekki vandamál sem slíkir heldur greinar og lauf, sem geti byrgt fólki sýn.

„Það virðist hafa verið gengið aðeins of langt í að laga sjónása á milli akandi og gangandi en fyrir vikið eru önnur áhrif talsvert neikvæð.“

Reglan sé almennt að tré auki umferðaröryggi og bæti göturými.

„Þetta hefur oft róandi áhrif á umferð. Hún ekur oftast aðeins hægar þar sem eru götutré eins og voru í Austurveginum. Og þetta gerir götuna náttúrulega líka vistlegri fyrir vikið,“ segir Samúel.


Tengdar fréttir

Faðmaði öspina áður en hún var felld

Í kvöld hófst vinna við að fella níu aspir við Austurveg á Selfoss í nafni umferðaröryggis. Óánægður bæjarbúi faðmaði eina öspina áður en hún var felld.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.