Innlent

Guðni biðst afsökunar á að hafa sagt fólki að vera ekki fávitar

Hallgerður Kolbrún E. Jónsdóttir skrifar
Guðni Th. Jóhannesson forseti Íslands
Guðni Th. Jóhannesson forseti Íslands Vísir/Vilhelm

Guðni Th. Jóhannesson, forseti Íslands, hefur beðist afsökunar á að hafa notað orðið fáviti í umræðu um kynferðisofbeldismál. Hann segir það ekki hafa gert neinum gott og allra síst honum sjálfum. 

Þetta skrifar Guðni í Facebook-færslu sem hann birtir í dag. Hann segist aldrei ætla að nota orðið í þessu samhengi þó það hafi verið gert með þessum hætti í grunnskólum landsins. Honum hafi þótt orðalagið of harkalegt. 

„Ég biðst afsökunar á að hafa í sjónvarpsviðtali í síðustu viku notað orðið fáviti í umræðu um viðkvæm og erfið mál og tekið almennt of sterkt til orða. Það gerði engum gott, allra síst mér. Afsökunin er skilyrðislaus,“ segir í færslu Guðna.

„Ég mun ekki nota orðið aftur í þessu samhengi þótt það hafi verið gert með þessum hætti í fræðslu í grunnskólum landsins. Það getur kannski átt við þar en alls ekki af minni hálfu. Ég sé svo sannarlega eftir því og ítreka að ég bið allt það fólk, sem ég særði, afsökunar.“

Hann ítrekar fyrri færslu sem hann birti um kynferðiofbeldi þann 6. september síðastliðinn, að umræða að undanförnu um ofbeldi og áreitni, þöggun og meðvirkni, hafi verið þörf. 

„Þau, sem verða fyrir ofbeldi eða áreitni, eiga ekki að þurfa að þola skömm í eigin huga eða afneitun þess sem gerðist af hálfu annarra. Ekki er hægt að jafna saman ofbeldi og áreitni annars vegar og sárindum vegna ósanngjarns umtals og sleggjudóma hins vegar.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.