Innlent

Hlaupið sópaði veginum frá eystri brúnni til Skaftárdals

Kristján Már Unnarsson skrifar
Hlaupið í dag. Vegurinn hefur sópast burt frá eystri brúnni til Skaftárdals.
Hlaupið í dag. Vegurinn hefur sópast burt frá eystri brúnni til Skaftárdals. Arnar Halldórsson

Hlaupið í Skaftá hefur náð hámarki og er byrjað að sjatna í árfarveginum. Þótt hlaupið sé minna en menn spáðu, telst það engu að síður mjög stórt.

Í beinni útsendingu í fréttum Stöðvar 2 frá vettvangi við brýrnar yfir Eldvatn í Skaftártungu kom fram að hlaupið gæti komist á spjöld sögunnar sem þriðja eða fjórða stærsta Skaftárhlaup frá upphafi mælinga.

Með 1.500 rúmmetra flóðtopp á sekúndu virðist hlaupið núna ætla að verða fjórðungi minna en hlaupið 2018, sem náði 2.000 rúmmetra rennsli á sekúndu, og helmingi minna en hlaupið árið 2015, sem mældist 3.000 rúmmetrar á sekúndu. Þau hlaup voru raunar svo stór að talað var um hamfarahlaup.

Varnargarður ofan við vestri brúna til Skaftárdals er horfinn í flóðið en einnig vegurinn vestan við brúna.Arnar Halldórsson

Bændur í Skaftártungu, helsta áhrifasvæðinu, vona samt innilega að hlaupið núna verði ekki stærra, eins og bóndinn á Búlandi, Auður Guðbjörnsdóttir, sem sýndi okkur túngirðingu sem komin var á kaf. Hún hafði þó meiri áhyggjur af veginum ofan Búlands en þar mátti sjá Skaftá flæða í kringum brýrnar tvær sem liggja að jörðinni Skaftárdal.

Auður Guðbjörnsdóttir, bóndi á Búlandi í Skaftártungu.Arnar Halldórsson

„Já, það er búið að sópast frá eystri brúnni. Það er töluverð vinna að koma því í stand aftur þannig að það sé fært þangað inn eftir. Þetta eru mikið notuð sumarhús.

Og svo er varnargarðurinn farinn. Það þarf að fá ýtu og vinna hann upp aftur. Það er alltaf talsverð vinna,“ sagði Auður á Búlandi.

Í stórhlaupunum árin 2015 og 2018 brotnuðu miklar fyllingar úr árbökkum Eldvatns við Ása. Gísli Halldór Magnússon, bóndi á Ytri-Ásum, segist einnig sjá breytingar núna í þessu hlaupi.

Gísli Halldór Magnússon, bóndi á Ytri-Ásum.Arnar Halldórsson

„Nú er komin hér ný sprunga sem var ekki fyrir fyrra hlaupið. Og æði stór fylla farin hér núna. Bara nýhrunið,“ sagði Gísli og benti á bakkann skammt ofan við nýju Eldvatnsbrúna.

Þeir Svanur Kristinsson, varðstjóri hjá lögreglunni á Suðurlandi, og Ágúst Bjartmarsson, yfirverkstjóri hjá Vegagerðinni í Vík, fylgdust í dag með hækkandi vatnsstöðu við þjóðveginn um Eldhraun.

Lögreglan og Vegagerðin fylgjast með flóðvatni safnast að þjóðveginum í Eldhrauni í dag.Arnar Halldórsson

„Já, við erum búnir að vera að sjá það í dag að þetta hefur hækkað talsvert hérna í svokölluðum Dyngjum,“ sagði Svanur og sagði að hringvegurinn yrði vaktaður í nótt.

-Búist þið við því að það muni flæða einhversstaðar yfir veginn?

„Allavega ekki í nótt, teljum við; ég og hann Ágúst vegaverkstjóri í Vík. Við teljum það mjög ólíklegt að það gerist í nótt. En hvað gerist á morgun? Það verðum við bara að sjá til,“ sagði Svanur.

Ef svo færi að hringvegurinn lokaðist í Eldhrauni þá væri unnt að nýta sveitaveginn um Meðalland sem hjáleið.

Hér má sjá frétt Stöðvar 2:

Sérfræðingur Veðurstofu Íslands fjallaði um hlaupið í fréttum Stöðvar 2 í gær:


Tengdar fréttir

Bíða þess að hlaupið nái há­marki við Þjóð­veginn

Talið er að Skaftárhlaup hafi náð hámarki sínu við Sveinstind en nú er þess beðið að hlaupvatnið nái hámarki við þjóðveginn á næstu dögum. Það flæki málin að vatn í ánni hafi verið mikið áður en hlaup hófst í Eystri-Skaftárkatli.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.